सुनसरी १८ असोज
समयमै औषधोपचार नपाउँदा नेपालमा बर्सेनि सयौँ मानिसले सर्पको टोकाइबाट ज्यान गुमाउने गरेका छन् । यस्तो समस्या विशेषगरी तराईका जिल्लामा बढी देखिने गरेको छ । यसैलाई ध्यानमा राखेर सर्पदंशको उपचारका लागि आवश्यक पर्ने औषधिको उत्पादन अब नेपालमै हुने भएको छ ।  समयमै औषधोपचार नपाउँदा नेपालमा बर्सेनि सयौंं मानिसले सर्पको टोकाइबाट ज्यान गुमाइरहेको परिप्रेक्षमा निजी क्षेत्रबाट सुनसरीको बराहक्षेत्र नगरपालिका–३ मा एन्टी भेनम सेरम रिसर्च एण्ड म्यानुफ्याक्चरिङ प्रालि खुलेको छ । भेनम उत्पादनका लागि ८८ करोड ६३ लाख खर्च छुट्याएर काम अघि बढाइएको कम्पनीका अध्यक्ष लक्ष्मीप्रसाद फुँयाल बताउनुहुन्छ । अध्यक्ष फुँयालले नेपालमा कानुन बनिसकेकोले अब दुई वर्षभित्रै स्नेक एन्टी भेनमु उत्पादन गर्ने बताउनुभयो ।  विगत केही वर्षदेखि सर्पको डसाईको औषधीका लागि भारतसँग निर्भर रहनु परेको अवस्थामा यस एन्टी स्नेक भेनम भेनम रिसर्च एण्ड म्यानुफ्याक्चरिङ्ग प्रा.लिको स्थापनापश्चात सर्पदंशको औषधीको परनिर्भरताका हट्ने विश्वास लिइएको छ । औषधि व्यवस्था विभागबाट भेनम उत्पादन अनुमति लिइसकेको भए पनि कम्पनी सर्प पाल्ने कानून नहुँदा अगाडि बढ्न सकेको थिएन । तर, अब सर्पदंशको औषधि नेपालमै सम्भव देखिएको, नेपालमै सर्पदंशको औषधि उत्पादन गर्न सकिने सम्भाव्यता अध्ययन गरिरहेका सर्पविद् लक्ष्मीप्रसाद फुयाँलले बताएका छन् । सर्पसँग निकै नजिक रहेका प्राबिधिक रामजी चौधरी अहिले सर्प संकलनमा लाग्नुभएको छ । सर्पदंशको औषधि उत्पादन गर्न सबैभन्दा पहिले सर्पको विष इन्जेक्सनमार्फत घोडामा पठाएपछि घोडाबाट निस्कने रगतबाट नै औषधि बनाउन सकिने सर्प विशेषज्ञको भनाइ छ । साथै निकट भविष्यमा कम्पनीको दक्षिण एसिया, अफ्रिका, यूरोपलगायतका ६० वटाभन्दा बढी देशहरुमा पनि निर्यात गर्ने गरी उत्पादन गर्ने उद्देश्य भएको हुनाले यसबाट राज्यलाई प्रत्यक्ष लाभ हुने देखिन्छ । निजि लगानीबाट यति ठूलो कामको सुरुवात भए पनि अहिलेसम्म्म राज्यको ध्यान जान सकेको छैन ।