भोजपुर १४ असोज
दुर्गम पहाडी जिल्ला भोजपुरको पश्चिम टेम्के मैयुङ गाउँपालिका वडा नम्वर २ छिनामखुमा रहेको गोठेसिं होमस्टे अहिले आन्तरिक तथा बाह्य पर्यटकका लागि आकर्षणको केन्द्र बनेको छ । सडक नजिकै सञ्चानलमा रहेकाले यो होमस्टेमा आउने जानेको संख्यासमेत बढेको छ । नेपाल सरकारले एक सय पर्यटकीय गन्तव्यमध्ये भोजपुरको टेम्केडाँडा ‘मुन्दुम ट्रेल’ लाई सूचीकृत गरेसँगै यहाँ घुम्न आउने बाह्य तथा आन्तरिक पर्यटकको संख्या बढ्न थालेको छ । फुर्सदलाई सदुपयोग गर्दै आफ्नो परिवार, साथीभाइसँग टेम्केडाँडा घुम्न आउने पर्यटकका लागि ‘गोठेसिं होमस्टे’ पनि प्रमुख रोजाइमा परेको छ । बिराटनगरबाट भोजपुर घुम्न आउँदा होमस्टे पुग्नु भएका स्कन्द घिमिरे । टेम्केमैयुङ गाउँपालिका छिनामखुको श्यामशिलामा रहेको यो होमस्टे सदरमुकामदेखि ४२ किलोमिटर पश्चिममा पर्छ । मीठो किराँती संस्कारको न्यानो अतिथि सत्कार, अग्र्यानिक मीठो खाना र आरामदायी सस्तो बासस्थानबाट सुन्दर प्राकृतिक सुन्दरता नियाल्ने पर्यटकका लागि यो होमस्टे जिल्लामा पर्यटकीय गन्तव्य बन्दै गइरहेको छ । पारिवारिक वातावरण, किराँती संस्कृति र स्वादिष्ट परिकाले होमस्टेको बसाई रमाइलो भएको त्यहाँ घुम्न पुग्नु भएका रबिन बाबु घिमिरेले बताउनुभयो । पुष्पलाल मध्य पहाडी राजमार्गसँगै रहेको होमस्टेमा अग्र्यानिक स्वाद र सत्कार पाइने गरिएकाले यो होमस्टेले आन्तरिक तथा बाह्य पर्यटनमा समेत टेवा पुर्याएको छ । होमस्टेलाई टेम्के मैयुङ गाउँपालिकाका साथै प्रदेश सरकारले समेत सहयोग गरेको संचालक प्रकाश राईले बताउनुभयो । टेम्केडाँडा मुन्दुम पदमार्ग पर्ने भएकाले यहाँ घुम्न आउने पर्यटकहरुका लागि एकमात्र आरामदायी बिसौनी बनेको गोठेसिं होमस्टे बस्न नचाहने कमै हुन्छन् । ५७ रोपनी जग्गामा उनले सञ्चालन गरेको होमस्टेमा टेम्के, चखेवाडाँडाको अवलोकनपछि विश्राम गर्ने पर्यटकको आगमनमा वृद्धि हुन थालेको छ । होमस्टेमा अहिले व्यवस्थापन गर्दै बासघर, कटेजहरु थप्त सुरु गरिएको छ । पर्यटकको स्वादका लागि माछाको परिकारका लागि सञ्चालक राईले पोखरी बनाएर ट्राउट माछा पाल्ने भएका छन् । होमस्टेलाई प्रबद्र्धन र प्रोत्साहन गर्न टेम्के मैयुङ गाउँपालिकाले भौतिक पूर्वाधारको पहुँचसमेत पुर्याएको छ । गाउँपालिकाले होमस्टेसम्म बिजुलीबत्ती र सडक पुर्याउन मद्दतसमेत गरेकोे गाउँपालिका अध्यक्ष धु्रवराज राईले बताउनुभयो । कोरोना संकटका कारण यो क्षेत्रमा आउनेहरुको संख्यामा कमि आएको भए पनि सुन्दर टेम्केडाँडा चुचुरोबाट तराईका सुन्दर हरिया फाँटहरु, कञ्चनजंगा, मकालुलगायत उत्तरतर्फ सेताम्मे मनोरम हिमश्रृंखला, सुन्दर हरिया डाँडाखर्क, खोटाङको दिक्तेल र भोजपुर सदरमुकाम र अनगिन्ती प्राकृतिक सुन्दरताको भरपुर मनोरञ्जन लिन सकिनेछ । यस्ता प्राकृतिक सुन्दर मनोरम स्थलहरुको संरक्षण र सम्वद्र्धनमा सबै पक्षको ध्यान जान जरुरी छ । मकालु समाचारका लागि भोजपुरबाट निरोज कोइरालाको रिपोर्ट ।
