विराटनगर ११ असोज

केही दिनयताको लगातारको बर्षाका कारण खोलानालाहरुको जलस्तर बढेको छ । खोलाको बढदो जलस्तरले बाढीको रुप लिने सम्भावना देखिएपछि तटीय क्षेत्रका बासिन्दामा त्रासको अवस्था सृृजना भएको छ । असोज पहिलोसाताबाट सुरु भएको लगातारको बर्षाले जलाशयहरुको जलस्तरमा लगातार बृद्धि हुँदै गएको छ । बढदो जलस्तरले बाढीको रुप लिने सम्भावना देखिएपछि खोला क्षेत्रमा घरटहरा बनाई बस्दै आएका सुकुम्बासी परिवारका साथै तटिय क्षेत्रका बासिन्दा भयभित भएका छन । जलस्तर लगातार बढेसंगै खोला क्षेत्रका कतिपय बासिन्दाका घरमा पानी प्रवेश गरेको छ । जसका कारण उनीहरु घर खाली गरेर सुरक्षित स्थान सरेका छन भने कतिपयले खोलाकै डिलमा पाल टाँगेर बसेका छन । विराटनगरस्थित सिंघीया खोला किनारमा घर बनाई लामो समयदेखि बस्दै आएका सिकन्दर सहनीले खोलाको जलस्तर बढदै गएर करेसाबारीसम्म पानी आएका कारण रातभरि निदाउन नसकेको बताउनुभयो । खोलाको बगरमैं घरहरु निर्माण गरिएका कारण समेत खोलाको जलस्तर सामान्य बढदा बाढीको अवस्था सृजना हुने गरेको छ । खोला क्षेत्र मिचेर बस्तीहरु निर्माण गरिएका कारण बर्षाको समयमा खोलाको जलस्तर बढदा पानीले निकास नपाउने भएपछि बाढी र डूबानको अवस्था सृजना हुँदै आएको हो । विराटनगर भएर बग्ने सिंघीया खोलाले वडानम्बर १,२,७,८,१४ र १८ नम्बर वडा लाई छुन्छ । यसैगरि केशलिया खोला वडानम्बर ४,५,६,११,१२ र १६ को सिमाना हुँदै बग्छ । ती दुई खोला किनारमा महानगरपालिका तर्फमात्र झण्डै ५ हजार ७ सय र कटहरी तथा दुहबी नगरपालिकातर्फ समेत हजारौं सुकुम्बासी परिवार बस्दै आएका छन । बाढीको अवस्था सृजना हुने सम्भावना देखिएपछि गाँउपालिका र सुरक्षा निकायलाई सो बिषयमा जानकारी गराई सकिएको कटहरी गाउँपालिका वडानम्बर १ का वडाध्यक्ष कपुरलाल माझीले जानकारी दिनुभयो । यसपटकको बर्षायाममा मात्र खोला क्षेत्रमा बसोबास गर्दै आएका सुकुम्बासी परिवारले तीन पटकसम्म घर छाडेर सुरक्षित स्थान सर्दै फर्किनु परेको छ । बाढीका कारण सुकुम्बासी परिवारले बर्षेनी जनधनको क्षति बेहोर्दै आएका छन भने राज्यले समेत उनीहरुको उद्धार र राहतमा ठूलो धनराशी खर्च गर्दै आएको छ । हरेक वर्ष दोहोरिरहने योे अवस्थाको अन्त्य गर्न खोला क्षेत्रका बासिन्दालाई सुरक्षित स्थानमा पुर्नस्थापना गर्नु नै उत्तम विकल्प हो ।त्रासको न्युनिकरणका लागि भने खोला किनारहरुलाई तटबन्ध गर्न आवश्यक छ ।