सुन्दरहरैँचा मोरङ १० असोज
पूर्व क्षेत्रलाई प्रदेश १ को राजधानी विराटनगर जोड्ने प्रदेश १ सरकारको गौरवको आयोजना रहेको मोरङको विराटचौक–घिनाघाट चारलेन सडकखण्डको निर्माण अहिले धमाधम भईरहेको छ । लकडाउनको समयमा समेत निर्माणले निरन्तरता पाएपछि तोकिएकै मितिमा सम्पन्न हुनेमा स्थानीय आशावादी देखिएका छन । यो सडक खण्डबाट प्रदेश नं १ को राजधानी विराटनगरतर्फ प्रवेश गर्न पूर्वक्षेत्रका बासिन्दालाई सहज हुने प्रदेश सरकारको बुझाइ रहेको छ । यो सडकको निर्माणकार्य सम्पन्न भएपछि विराटनगर–इटहरीको सवारी चाप घट्नुका साथै पूर्वबाट विराटनगर आउन जान दुरी समेत कम हुने छ । चार लेनको सडक निर्माणले उत्तरी मोरङका मात्र नभएर पूर्वका झापा, इलाम, पाँचथर र ताप्लेजुङका यात्रुलाई समेत सुविधा हुने छ । सडकलाई विराटचोकदेखि नेताचोकसम्म र नेताचोकदेखि मिलनचोकसम्म दुई खण्डमा विभाजन गरी २० किलोमिटर ठेक्का लगाएर काम नियमित भैरहेको छ । १ अर्ब ४० करोड रुपैयाँको लगानीमा निर्माण भइरहेको सडकको निर्माण सम्झौता अनुसार निर्माण कम्पनीले २०७८ असार मसान्तभित्रमा काम सकेर यो प्रदेश सरकारलाई हस्तान्तरण गर्नुपर्ने छ । प्रदेशकै गौरवकै योजना भएकोले दवावका कारण लकडाउनको अवधिमा समेत सामाजिक दुरी कायम गरेर काम चालू गरिएको निर्माण पक्षले जनाएको छ । सडकको कामलाई नजिकबाट निहालिरहेका स्थानीयले पनि लकडाउनमा समेत निर्माणकार्य नरोकिएको भन्दै समयावधिमा निर्माण सम्पन्न हुने अपेक्षा गरेका छन । समग्र प्रदेशकै गौरवको आयोजना भएको यो सडकले सामाजिक आर्थिक राजनैतिक हिसाबले र मोरंग जिल्लाकै सदरमुकाम तथा प्रदेशको राजधानी बिराटनगर जान सहज हुने प्रदेश सांसद राजकुमार ओझा बताउनु हुन्छ। सोही क्षेत्रका जनप्रतिनिधी रहनु भएका सांसद ओझाले समयमै र गुणस्तरीय रुपमा काम सकाउने गरि नियमन र खबरदारी भईरहेको बताउनुभयो । यो सडक निर्माण हुँदा ग्रामथान गाउँपालिका र सुन्दरहरैंचा नगरपालिकालाई छोएको हुनाले त्यहाँका जनतालाई सहजता हुनेछ । यस्तै पहाडी क्षेत्रबाट आउन जानका लागि बिराटनगर छोटो दुरी हुने सुन्दरहरैंचा नगरपालिकाका मेयर शिवप्रसाद ढकालको भनाई रहेको रहेको छ ।  प्रदेश राजधानी विराटनगर प्रवेश गर्ने दोस्रो मूल ढोकाको रूपमा हेरिएको यो सडक निर्माण कार्यको आवश्यक नियमन र अनुगमन गर्न पति उत्तिकै जरुरी छ ।