विराटनगर, २७ असार । मकालु टेलिभिजनका कार्यक्रम उत्पादन शाखा प्रमुख अभयकुमार राई मेम्बर चन्द्रलाल–दुर्गादेवी दाहाल श्रमजिवी पत्रकारिता पुरस्कारबाट पुरस्कृत हुनुभएको छ ।
सञ्चारकर्मी सञ्चार सहकारी संस्था लिमिटेड विराटनगरले सातौं स्थापना दिवसको अवसरमा राईलाई पुरस्कृत गरेको हो । सामाजिक विकासमन्त्री जीवन घिमिरे र सञ्चारकर्मी सञ्चार सहकारी संस्था लिमिटेडका अध्यक्ष मोहन भण्डारीले उहाँलाई नगद २१ हजार राशिसहित सम्मानपत्र प्रदान गर्नुभयो । राईसँगै इलामका पत्रकार भीम चापागाईंलाई ओमप्रकाश गोयल आर्थिक पत्रकारिता पुरस्कार र उर्लाबारीबाट पत्रकारिता गर्दै आउनुभएकी ज्योति चौहानलाई मिना श्रेष्ठ श्रमजीवि महिला राष्ट्रिय पुरस्कार प्रदान गरिएको छ । आर्थिक पत्रकारिता पुरस्कारको राशी ३१ हजार र महिला श्रमजीवि पुरस्कारको राशी नगद १० हजार र सम्मानपत्र रहेको छ । उहाँहरुलाई समेत सामाजिक घिमिरे पुरस्कृत गर्नुभयो । सो अवसरमा बोल्नुहुँदै मन्त्री घिमिरेले पत्रकारहरु समाज परिवर्तनका संवाहक रहेकाले पत्रकारिता पेशालाई व्यवस्थित बनाइनुपर्ने बताउनुभयो । उहाँले पत्रकारहरुले न्युनतम पारिश्रमिक पाउन नसकेकाले पत्रकारिता पेशाबाटै पलायन हुने अवस्था रोक्न सबै पक्ष जिम्मेबार हुनुपर्नेमा जोड दिनुभयो ।
