मोरङ सुन्दरहरैंचा २८ भाद्र
मोरङको सुन्दरहरैंचाका किसानहरु केरा बिक्री नभएर बारीमै कुहिन थालेपछि चिन्तित बनेका छन् । लकडाउनका कारण बजारहरु पूर्णरुपमा नखुल्दा तथा ढुवानीमा देखिएको अवरोधका कारण केरा बिक्री नभएपछि समस्या भएको हो । मोरङको सुन्दरहरैंचा–७ गोठगाउँ क्षेत्रमा लगभग ५ सय बिघामा केरा खेती गरिएको छ । यहाँका अधिकांश किसानले व्यावसायिक रुपमा केरा खेती गर्दै आएका छन् । यस क्षेत्रबाट राजधानी लगायतका ठाउँहरुमा हरेक वर्ष करोडौंको केरा निर्यात हुने गरेको छ । तर यसवर्ष लगातारको लकडाउन र ढुवानीमा देखिएको अवरोधका कारण केरा विक्री नभएपछि किसानहरु चिन्तित बनेका छन् । यहाँका अधिकांश किसानले जग्गा ठेक्का लिएर ऋण काढेर केरा खेती गर्दै आएका छन् । जसबाट अघिल्ला वर्षहरुमा उनीहरुले प्रति विगाहा वर्षको १ देखि २ लाखसम्म आम्दानी लिंदै आएका थिए । तर यसवर्ष केरा बिक्री नभएर बोटमै कुहिने अवस्था आएपछि लगानीसमेत नउठ्ने अवस्था आएको उनीहरुको गुनासो छ ।
यस क्षेत्रका अधिकांश किसानले स्थानीय सुन्दरपुर साना किसान सहकारी संस्थाबाट ऋण लिएर केरा खेति गर्दै आएका छन् । सो सहकारीले आफ्नो लगानीको ठूलो हिस्सा केराखेतिमा लगाएको छ । जसका कारण किसानको केरा विक्री नहुँदा सहकारीको लगानीसमेत जोखिममा परेको सहकारीका अध्यक्ष रविन्द्र आचार्यको गुनासो छ । सरकारले लकडाउनको अवस्थामा समेत कृषिजन्य उत्पादनलाई ढुवानी र विक्रीमा अवरोध नगर्ने भने पनि व्यवहारमा त्यो लागू हुने नसकेको केरा किसानहरुको गुनासो छ । उनीहरुले जुनसुकै अवस्थामा पनि कृषिजन्य उत्पादनको ढुवानी र विक्रीका लागि सहज वातावरण बनाइ दिन मागसमेत गरेका छन् । यता किसानको बारीबाट केरा खरिद गरेर विभिन्न बजारमा लैजाने व्यापारीहरुको समेत आफ्नै पीडा छ । सरकारले कृषिजन्य सामाग्रीमा अवरोध नगर्ने भनेपनि ढुवानीका क्रममा स्थानीय पालिका र जिल्ला अनुसारको नियम फरक भएका कारण अवरोध हुँदा समस्या हुने गरेको व्यापारीहरु बताउँछन् । नजिकैको शहरुहरुमा निकै महंगोमा विक्री हुने केरा ढुवानीकै समस्याका कारण बारीमै कुहिएर जाने अवस्था आउनु निकै दुःखदायी छ ।