इटहरी २५ भाद्र
सम्पूर्ण राज्य संयन्त्र नै कोरोना भाइरस नियन्त्रणको अभियानमा केन्द्रीत भएका बेला सुनसरीको इटहरीमा भने फरक खाले अभियान सुरु गरिएको छ । इटहरीका युवा अभियन्ताहरुले इटहरीलाई जंगलभित्रको सहर बनाउने उद्देश्यका साथ विरुवा गोडमेल अभियान सुरु गरेका छन् । विश्व नै कोरोनाको चपेटामा परेको र इटहरी समेत कोरोनाको प्रभावित क्षेत्र भए पनि यहाँका युवा अभियन्ताहरुले भने सकरात्मक सन्देश दिने उद्देश्यका साथ गत साउनदेखि विरुवा गोडमेल अभियान सुरु गरेका हुन् । प्रत्येक हप्ताको शनिबार चल्ने यस अभियानमा इटहरी क्षेत्रभित्र जो कसैले रोपेका बिरुवा गोडमेल गर्ने गरिएको छ । जसअन्तर्गत एक बर्षमा १ लाख बिरुवा हुर्काउने र विश्वको सबैभन्दा ठुलो वातावरणिय अभियान बनाउने लक्ष्य रहेको अभियन्ता सुरेश कार्कीको भनाइ छ ।
हराभरा प्रकृति सुपर समृद्धि भन्ने मुल नाराका साथ हरेक सनिबार बिरुबा गोडमेल गर्ने गरिएको छ । उपमहानगरले वा बिभिन्न सामाजिक संघ संस्थाले रोपेका विरू गोड्ने र हुर्काउने जिम्मा ग्रिनमेन गोडमेल अभियानले लिएको छ । ‘रोपिएका हजारौँ बिरुवालाई अबको १० वर्षभित्र हुर्काइ इटहरीलाई हरियालीको सहर बनाउने योजना यस अभियानले लिएको छ । गत साउन १५ गतेबाट सुरू भएको गोडमेल अभियानमा नागरिक सहभागितामा २ घण्टामा २ हजार बिरुवा गोडिएको थियो । सोही अभियानलाई निरन्तररुपमा अघि बढाउँदै इटहरीलाई जंगलभित्रको शहर बनाउने बताइएको छ । यसमा सबै नगरबासीले सहयोग गरेर अघि बढ्नुपर्नेमा अभियन्ताहरुले जोड दिएका छन् ।
सहरलाई हराभरा बनाउन बोटबिरुवा खरिद गर्ने, रोप्ने तर संरक्षण नगर्ने प्रवृत्तिले बर्षेनि ठुलो बजेटसमेत दुरुपयोग भइरहेको छ । बिरुवा रोपेझैं गरेर गोडमेलको अभावमा त्यतिकै छाड्ने गरेको दृश्य हामी देखिरहेका हुन्छौं । सोही कुरालाई मध्यनजर गर्दै हरित नगरीको उपमा पाएको इटहरीलाई यथार्थमै हरित नगरी बनाउने उद्देश्यका साथ सुरु गरिएको गोडमेल अभियान निकै सह्रायीन छ ।