झापा २४ भाद्र
कोरोना भाइरसको संक्रमण समुदायमै फैलिएपछि झापाका स्थानीय तहहरुले धमाधम आइसोलेसन निर्माण गरी सञ्चालन गर्न थालेका छन् । पूर्वमा संक्रमित उपचारका लागि व्यवस्था गरिएका अस्पतालमा संक्रमित भरिएपछि स्थानीय सरकार आफैं आइसोलेसन निर्माणमा जुटेका हुन् ।
नेपालमा कोरोना संक्रमितको संख्या बढ्दै गएपछि सरकारले स्थानीय तहमै आइसोलेसन निर्माण गर्न निर्देशिका जारी गरेको थियो । जिल्लामा समेत संक्रमित बढ्दै गएपछि जिल्ला विपद् व्यवस्थापन समिति झापाले व्यवस्थापनका लागि प्रत्येक स्थानीय तहमा कम्तीमा २५ शैय्याको आइसोलेसन निर्माण गर्ने निर्णय गर्यो । जिल्लामा समुदायस्तरमा समेत कोरोना देखिएपछि धेरैजसो पालिकाहरुले आइसोलेसन वार्डको व्यवस्थापन गरिसकेका छन् । जिल्लाका १५ स्थानीयतहहरुमध्ये संक्रमितको संख्या बढी रहेका पालिकाहरुले आइसोलेसन निर्माण गरिसकेका छन् । कतिपय पालिकाले स्थानीय स्वास्थ्य चौकीलाई र कतिपयले सामुदायिक विद्यालयको भवनलाई आइसोलेसनका रुपमा विकास गरेका छन् । झापाको दमक, गौरादह, अर्जुनधारा, मेचीनगर नगरपालिका तथा कमल र बुद्धशान्ती गाउँपालिकाले आइसोलेसन वार्ड निर्माण गरिसकेका छन् । स्थानीय स्रोत, साधन र जनशक्तीले भ्याएसम्म आइसोलेसनलाई व्यवस्थित गर्ने प्रयास गरिएको स्थानीय पालिकाका स्वास्थ्य शाखाले जनाएको छ ।
यसअघि दमक अस्पताल र मेची अञ्चल अस्पतालमा आइसोलेसन वार्डको व्यवस्था गरिएको थियो । झापाका स्थानीय तहहरूले शङ्कास्पद कोरोना सङ्क्रमणका बिरामीलाई भद्रपुरस्थित मेची अञ्चल अस्पताल र दमकको दमक र आम्दा अस्पतालमा पठाउँदै आएका थिए । संक्रमितहरुलाई भने प्रदेश सरकारले निर्माण गरेको आइसोलेसन र अस्पतालमा पठाउने गरिएको थियो । अहिले भने संक्रमितलाई सम्बन्धित पालिकाको आइसोलेसनमा र लक्षणसहितका संक्रमितलाई मेची प्रादेशिक अस्पतालको कोभिड अस्पतालमा राखिन थालिएको छ ।
झापामा आइसोलेसनमा रहेका सक्रिय संक्रमित १ सय ५० भन्दा बढी छन् । जिल्लामा कुल संक्रमितको संख्या ६ सय ५० नाघिसक्दा ३ जनाको मृत्यु भइसकेको छ । पछिल्लो तथ्याङ्कअनुसार जिल्लामा सुरक्षाकर्मी, स्वास्थ्यकर्मीसँगै ‘कन्ट्रयाक ट्रेसिङ्ग’ मा समेत नपरेका समुदायका मानिसहरुमा समेत संक्रमण पुष्टि भइसकेको छ । जसले गर्दा झापामा संक्रमण तीव्ररुपमा फैलिने जोखिम बढेको छ । त्यसैले गर्दा अब आइसोलेसन वार्डहरुलाई व्यवस्थित गर्नुपर्ने बेला आएको छ ।
