मोरङ २२ भाद्र
विश्वव्यापी रुपमा फैलिएको कोरोना भाइरस (कोभिड–१९) का कारण विगत ६ महिनादेखि सबैजसो क्षेत्र ठप्प छ । कोरोनाले सबैभन्दा बढी असर पारेको क्षेत्रमध्ये शैक्षिक क्षेत्र पनि हो । ६ महिनादेखि शैक्षिक क्षेत्र ठप्प हुँदा विद्यार्थीहरुको भविष्य अन्यौलमा परेको छ । विद्यालय बन्द भएर फुर्सदिला बनेका विद्यार्थीहरु यतिबेला माछा मारेर समय व्यतीत गरिरहेका छन् । कोरोना नियन्त्रण र रोकथाम गर्ने उद्देश्यले सरकारले जारी गरेको लकडाउन यतिबेला केही खुकुलो भए पनि शैक्षिक संस्था ठप्प छ । विगत ६ महिनादेखि पठनपाठन ठप्प हुँदा यतिबेला बालबालिकाहरु फुर्सदिला बनेका छन् । विद्यालय बन्द भएपछि उनीहरु घरमा बस्नु भन्दा विभिन्न खेल खेल्ने र माछा मार्ने काममा व्यवस्त भएको देखिन्छ । सहरी भन्दा ग्रामीण क्षेत्रका अधिकांश बालबालिकाहरु खेल्न र माछा मार्नेमा बढी व्यस्त रहेको पाइन्छ । घरमा बस्दाबस्दा दिक्क लागेर मन भुलाउनका लागि पनि माछा मार्ने गरेको कटहरीका विद्यार्थी भक्तिनारायण राजवंशीको भनाइ छ । घरमा बसेर पढ्दा कतिपय कुराहरु नबुझ्दा समस्या आउने गरेको उनको भनाइ छ । लामो समय विद्यालय बन्द हुँदा भविष्य नै अन्यौलमा परेको राजवंशीले बताए । सहरी क्षेत्रका सीमित विद्यालयहरुले अनलाइन कक्षा सञ्चालन गरिरहेका छन् । सहरी क्षेत्रमै पनि सबै विद्यार्थीको पहुँच अनलाइन कक्षामा पुग्न नसकेको अवस्थामा ग्रामीण क्षेत्रका विद्यार्थीमा पुग्ने कुरै आएन । अब स्वास्थ्य मापदण्ड पूरा गरेर पठनपाठनलाई विस्तारै सुचारु गर्दै जानुपर्ने आवाजसमेत उठ्न थालेको छ । स्वभाविक रुपमा बालबालिकाहरु चञ्चले हुन्छन् । उनीहरु एकैठाउँमा धेरैबेर बसिरहन सक्दैन । त्यही भएकाले पनि यतिबेला सहरीसँगै ग्रामीण क्षेत्रका बालबालिकाहरु माछा मारेर समय कटाइरहेका छन् । दिनभरि विद्यालय जाने र घर आएर पनि गृहकार्य गर्ने काममा व्यस्त रहने विद्यार्थीहरु चैतदेखि कामविहीन भएका छन् । चैत ११ गतेदेखि सरकारले जारी गरेको लकडाउन बीचमा केही खुकुलो भए पनि पुनः देशका अधिकांश क्षेत्रमा निषेधाज्ञासहित लकडाउन लागू गरिएको छ । कोरोनाको संक्रमण फैलिँदा जाँदा विद्यालय कहिले खुल्ने हो भन्ने यकिन छैन । कटहरी–१ की गोमा निरौला पनि घरमा पढ्नै मन नलाग्ने गरेको सुनाउँछिन् । विभिन्न खेल खेलेर समय बिताउने गरेको निरौलाले सुनाइन् ।  विद्यालय जान नपाएपछि विद्यार्थीहरु खोला र पोखरीहरुमा माछा मार्न जाने गरेका छन् । मोबाइलमा खेल खेल्ने, टिभी हेर्ने, माछा मार्नेलगायतमै बालबालिकाहरु व्यस्त भएको पाइएको छ । पढाइ नभएको बेला बालबालिका यस्तो काममा अलमलिनुलाई स्वभाविक रुपमा लिनुपर्ने प्याब्सन मोरङका कार्यसमिति सदस्य रामकुमार राजवंशीको भनाइ छ । माछा मार्न खोला र पोखरीमा जाँदा बालबालिकाहरु डुब्ने जोखिम बढेको छ । कतिपय स्थानमा माछा मार्ने क्रममा डुबेर बालबालिकाको मृत्यु भएका घटनाहरु पनि सार्वजनिक भइरहेका छन् । बालबालिकाहरुलाई दुर्घटनाबाट जोगाउन अभिभावकले विशेष ध्यान दिनुपर्छ ।