बारा २१ भाद्र
बारामा बन्न लागेको दोस्रो अन्तर्राष्ट्रिय विमानस्थल क्षेत्रभित्र रहेका रुख विरुवाको गणना सुरु भएको छ । विरुवाको गणना सुरु भएसँगै विमानस्थल निर्माण हुनेमा स्थानीयवासी आशावादी बनेका छन् ।  विमानस्थल निर्माण गर्दा ठूलो संख्यामा रुख काटिने हल्ला र विवादलाई चिर्न भन्दै वन मन्त्रालयले रुख विरुवाको एकिन तथ्याङ्क निकाल्न लागेको हो । विमानस्थल निर्माणस्थलमा भएको करिब आठ हजार हेक्टरमध्ये अहिले १९ सय हेक्टर क्षेत्रको गणना गर्न डिभिजन वन कार्यालय बारालाई पत्राचार गरेपछि रुखको गणना र ट्याग गर्ने कार्य सुरु गरेको हो । विमानस्थल निर्माणका लागि सरकारले छुट्याएको आठ हजार ४५ हेक्टर भू–भागमध्ये वन कार्यालय बाराले जि.पि.एस प्रणालीमार्फत पहिलो चरणमा १९ सय हेक्टरभित्र रहेका रुखहरुको गणना गरिरहेको छ । १९ सय हेक्टर वन क्षेत्रलाई १२ क्लष्टरमा विभाजन गरी कार्य थालनी गरेको डिभिजन वन कार्यालय बाराले जनाएको छ । पहिलो क्लष्टरको गणना गर्ने कार्य सकिएको डिभिजन वन प्रमुख मन्जुर अहमदले बताउनुभयो । पहिलो क्लष्टरको करिब ९८ हेक्टर क्षेत्रफलमा गणना सकिँदा २७ हजार पाँच सय ३३ को संख्यामा पोल र रुख रहेको डिभिजन वन कार्यालय बाराले जनाएको छ । अहिलेसम्म ३० हजार ६ सय पोल र रुखहरुमा नम्बर प्लेट लगाइसकेको र जसमध्ये अधिकांश साल प्रजातिका रुखहरु भएको समेत डिभिजन वन कार्यालय बाराले जनाएको छ । वन प्राविधिकसहित १७ जनाको टोलीले करिब एक महिनादेखि रुखको गणना गर्ने कार्य गर्दै आइरहेको छ । दोस्रो अन्तर्राष्ट्रिय विमानस्थल निमार्णको काम अगाडि बढाउन मन्त्रिपरिषद्ले निर्णय गरेमा रुख र पोलको संख्या यकिन गर्न यो तथ्यांक काम लाग्ने डिभिजन वन कार्यालय बाराले जनाएको छ । यसको मुख्य उद्देश्य प्रस्तावित दोस्रो अन्तर्राष्ट्रिय बिमानस्थल क्षेत्रमा २४ र २५ लाख रुख काटिने भनेर गलत प्रचार भएकाले वास्तवमै यो क्षेत्रभित्र रुख र पोलको संख्या कति छ भनेर प्रमाणित गर्न गणना सुरु गरिएको हो । विमानस्थलको विषय सर्वाेच्च अदालतमा बिचाराधिन भएकाले अदालतले पनि रुख र पोलको संख्या कति छ ? भनेर तथ्यांक मागेकोमा त्यसका लागि यकिन तथ्यांक दिन काम लाग्ने डिभिजन वन कार्यालय बाराका प्रमुख मन्जुर अहमतले बताए । यसअघि विमानस्थल निर्माण क्षेत्रलाई तारबार लगाउने, पश्चिमतर्फको पसाह खोलामा तटबन्द र मुआव्जासमेत वितरण गरिसकेको दोस्रो अन्तराष्ट्रिय विमानस्थल कार्यालय सिमराले जनाएको छ । यस विमानस्थल क्षेत्रको चार किल्लाभित्र रहेका रुख, विरुवामा नम्बरिङ्ग, ट्रयागिङ्ग कार्य शुरु गरिएसँगै विमानस्थल बन्ने आशा पलाएको छ । हालसम्म विमानस्थल निर्माण गरिनु पूर्व तयारीका कार्यका लागि ६७ करोडभन्दा बढी खर्च भइसकेको छ ।