विराटनगर १७ भाद्र
विराटनगरस्थित म्याक्स इन्टरनेश्नल हस्पिटल एण्ड ट्रमा सेन्टरले एक नवजात शिशुमा देखिएको दुर्लभ रोगको सफल शल्यक्रिया गरेको छ । विराटनगर–११ स्थित सो अस्पतालले धनकुटा चौबिसे गाँउपालिकाका नवजात शिशुको सानो आन्द्रा बटारिएर कुहिएको रोगको शल्यक्रिया गरि सफल उपचार गरेको हो । समय नपुग्दै कम तौलसहित जन्मिएका ती शिशुलाई अभिभावकले साउन ३२ गते सो अस्पतालमा भर्ना गरेका थिए । साउन २९ गते घरमै नर्मल अवस्थामा जन्मिएका शिशुको जन्मदा शारिरीक तौल १ किलो ६ सय ग्राम मात्र थियो । जन्मिदै आन्द्रामा समस्या भएका कारण शिशुको नाभीको प्वालबाट फोहोर निस्किने समस्यासमेत रहेको शिशुका बाबु चौबिसे गाउँपालिकाका–७ का सन्तु सेम्जोङले जानकारी दिनुभयो । शल्यक्रियापछि अहिले शिशुको अवस्था सुधारोन्मुख रहेको उहाँले बताउनुभयो । चिकित्सकीय भाषामा मिकस डाइर्भटिकुलम भनिने सो समस्या हजारौं शिशुमध्ये कुनै एक–दुईमा मात्र देखिने गरेको अस्पताल स्रोतले बताएको छ । आन्द्रा बटारिएर कुहिने त्यस प्रकारको समस्यामा शिशुको दिसापिसाब बन्द हुने, पेट फुल्ने र इन्फेक्सनलगायतका जटिल समस्या हुने गरेको शिशुको शल्यक्रिया गर्नुभएका पेडियाट्रिक सर्जन डाक्टर रमाशंकर यादवले जानकारी दिनुभयो । समय नपुगि कम तौल तथा आन्द्राको समस्यासहित जन्मिएका शिशुको शल्यक्रिया थप जटिल बनेको डाक्टर यादवले बताउनुभयो ।  शिशुको तौल तीन किलो बढी पुगेपछि फेरि एकपटकको शल्यक्रियापछि शिशु पूर्णरुपले स्वस्थ्य हुने डाक्टर यादवले दाबी गर्नुभयो । उक्त रोगको शल्यक्रिया धरानको विपी कोइराला स्वास्थ्य विज्ञान प्रतिष्ठानका अतिरिक्त काठमाण्डौका ठुला अस्पतालहरुमा मात्र हुँदै आएको अस्पतालले जनाएको छ । बितेको वर्ष १ सय ५० र चालु आर्थिक बर्षको हालसम्म म्याक्स अस्पतालमा ८ वटा जटिल शल्यक्रिया गरिएको जनाइएको छ ।