पूर्वी पहाडी जिल्ला भोजपुरको दक्षिणमा रहेको गाउँपालिकाहरुमा सञ्चारको पहुँच त पुगेको छ तर टेलिकमले जडान गरेका टावरहरुमा बिद्युत सेवा नपुग्दा स्थानीय संचार सेवाबाट बञ्चित हुँदै आएका छन् ।
जिल्लाको दक्षिणमा रहेका हतुवागढी, आमचोक र रामप्रसाद राई गाउँपालिकाका स्थानियहरुको मोवाइल फोन बिहानी पख र साँझ परेपछि स्वीच अफ हुने गरेको छ । यसको कारण यस क्षेत्रमा रहेको नेपाल टेलिकमको टावरले काम नगर्नु हो । यस ठाउँको संचारको साधन भनेको मोवाइल मात्र हो । बादल लागेको मौसममा समेत फोन केही नबुझिने र साँझ परेपछि त टावर नै जाने स्थानियको गुनासो रहेको छ । कुनै आपतविपत परिहाल्यो भने पनि कसैसँग सम्पर्क गर्न नसकिने उनीहरुको भनाइ छ ।
दक्षिणी क्षेत्रका जनतालाई मध्येनजर गर्दै यी ठाउँहरुमा नेपाल टेलिकमको टावर निर्माण गरिएको हो । उच्च ठाउँमा टावर राख्नुपर्ने र चिसो मौसम तथा बादल लागेको बेला सोलारले काम नगरेपछि यस्तो समस्या भएको हो । दिउँसोको सयममा जेनतेन टावर सञ्चालन भए पनि साँझ परेपछि विद्युत नहुँदा समस्या भएको नेपाल टेलिकम भोजपुरले जनाएको छ । स्थानिय सरकारले पनि यो कामलाई चासोको साथ लिएको छ । संचार जस्तो महत्वपुर्ण सेवाबाट कोही पनि वञ्चित हुन नहुने भन्दै अव स्थानिय लघु जलविद्युत आयोजनासँग कुरा गरेर टावरमा विद्युतको व्यवस्था गरिने जिल्ला समन्वय समिति भोजपुरकी सदस्य सविना राईको भनाइ छ ।
गाउँमा सेवा पुगेर पनि स्थानीयले नियमित प्रयोग गर्न नपाउनु दुःखको कुरा हो, विद्युतको वैकल्पिक व्यवस्था गरेर भए पनि सेवा नियमित गराउन सरोकारवालाले ध्यान दिनु जरुरी छ ।
