चितवनमा अवैध रुपमा यौनधन्दा चलाउँदै आएका होटल सञ्चालकसहित तीन जनालाई प्रहरीले पक्राउ गरी सार्वजनिक गरेको छ ।
क्लिन चितवन बनाउने अभियानमा अवैध यौनधन्दा बढेको भन्ने आम जनताको गुनासोको आधारमा प्रहरीले उनीहरुलाई पक्राउ गरेको हो । पछिल्लो समयमा फस्टाउदै गरेको यौन विकृतिको नमुना मात्र भएको भन्दै चितवन प्रहरीले नमुनाको रुपमा देखिएको यो दृश्य र संवाद चितवनको लागि कुनै नयाँ र नौलो कुरा भने नभएको बताएको छ । भरतपुर महानगरपालिकाको खोटाङ सगरमाथा होटल एण्ड गेष्ट हाउसका सञ्चालक जंगबहादुर क्षेत्री, उनकी श्रीमती निर्मला थापा क्षेत्री र धरानकी रोशिका राईलाई पक्राउ गरिएको एसपी दानबहादुर मल्लले जानकारी दिनुभयो । दुई जना युवतीलाई होटलको कोठामा बन्धक बनाई विगत लामो समयदेखि बेश्यावृतीमा लगाएको भन्ने सूचनाको आधारमा ३ जनालाई पक्राउ गरेको एसपी मल्लले बताउनुभयो । होटलमा १८ देखि २३ वर्ष उमेरका युवतीहरुलाई होटल सञ्चालकले यौनधन्दामा लगाउने र उनिहरूलाइ सो बापत ५ देखि १५ सयसम्म रकम दिने गरेको खुल्न आएको छ । पक्राउ परेकाहरु तीनै जनाविरुद्ध मानव बेचबिखन तथा ओसारपसार मुद्दा दर्ता गरी अनुसन्धान प्रकृया अगाडि बढाइएको चितवन प्रहरीले जनाएको छ ।
