मोरङको सुन्दरहरैंचास्थित बाँसबारीका स्थानीयबासीले महिनौंदेखि भत्किएको सडक नबनाएको भन्दै विरोध स्वरुप हरेक दिन विहान १५ मिनेट चक्काजाम गर्दै आएका छन् । आइतबार स्थानीयबासीलाई चक्काजाम नगर्न भन्दै सम्झाउन पुगेका सडक डिभिजन कार्यालय विराटनगरका कर्मचारीलाई स्थानीयबासीले सडक किन नबनाएको भन्दै र्याख–र्याख्ती पारेका छन् ।
प्रदेश लेखा नियन्त्रक कार्यालयका पटक–पटक सडक डिभिजन कार्यालय विराटनगर र स्थानीय जनप्रतिनिधिलाई जानकारी गराउँदा समेत काम नभएको भन्दै स्थानीयबासी आन्दोलित भएका हुन् । झण्डै ६ महिना अघिदेखि विग्रिएको बाटो मर्मत गर्न सरोकारवाला निकायले ध्यान नदिएपछि स्थानीयबासीले विरोध स्वरुप शनिबार र आइतबार १५ मिनेट चक्काजाम गरेका छन् । आइतबार चक्काजाम सकिएपछि पुगेका सडक डिभिजन कार्यालय विराटनगरका सव इञ्जिनियर राजेश यादवलाई स्थानीयबासीले र्याख–र्याख्ती पारेका हुन् । यतिका समय सडक भत्कँदा समेत किन नबनाएको भन्दै उनीहरुले सव इञ्जिनियर यादवलाई प्रश्न गरे । स्थानयबासीको प्रश्नको जवाफ दिंदै सव इञ्जिनियर यादवले सुनसरी र मोरङका सबै सडक मर्मतका लागि आइतबार नै ठेक्काको शिलबन्दी खोल्ने भएकाले बढीमा १ महिना भित्र काम सुरु हुने प्रतिवद्धता जनाउनुभयो । साथै धुलो उड्न नदिन तत्काल मोटर जडान गरि पानि हाल्न थालिएकाले स्थानीयबासीले आजैदेखि धूलो खान नपर्ने भन्दै उहाँले चक्काजाम नगरदिन आग्रह गर्नुभयो ।
सव–इञ्जिनियर यादवको जवाफ सुनेपछि स्थानीयबासीले १ महिनाभित्र काम हुनुपर्नेमा जोड दिंदै काम नभए कडा भन्दा कडा आन्दोलन गर्ने चेतावनी दिएका छन् । सडक भत्किएको महिनौं वितिसक्दा समेत मर्मत नगरेपछि स्थानीयबासी आन्दोलित भएका हुन् । पूर्वपश्चिम राजमार्गको सो क्षेत्रमा करिव १ सय मिटर बाटो पूरै कच्ची अवस्थामा छ । जसका कारण दैनिक हजारौंको संख्यामा सवारी साधन आवत–जावत गर्दा धूलो उडेर वरिपरिका बासिन्दालाई समस्या भएको छ भने दुर्घटनाको जोखिम समेत बढेको छ ।
