इटहरी उपमहानगरपालिकाले रानी–विराटनगर–इटहरी–धरान सडक सुधार आयोजनासँग आवश्यक सबै कागजपत्र उपलब्ध गराइदिन माग गरेको छ ।
इटहरीकी उपमेयर लक्ष्मी गौतमको नेतृत्वमा इटहरीदेखि तरहरासम्मको सडकको विभिन्न ठाउँमा नाप्ने काम सकिएको छ । सडक निर्माणमा समन्वय, सहकार्य र सहयोग गर्ने प्रयोजनका लागि इटहरी–तरहरा सडकखण्डको डिपीआर, खरिद सम्झौतालगायतका कागजपत्र उपलब्ध गराउन माग गरेको जनाइएको छ । इटहरी–तरहरा सडकखण्डमा फरक–फरक मापदण्ड कायम गरी निर्माण भइरहेको भन्ने विषयमा अन्यौल कायम भएको भन्दै विभिन्न संघसंस्थाले उपमहानगरको ध्यानाकर्षण गराइरहेकाले कागजपत्र माग गरिएको पत्रमा उल्लेख गरिएको छ । उपमेयर गौतमको नेतृत्वमा नागरिक समाज, संघर्षसमिति, उपमहानगर र आयोजनाका इन्जिनियरले इटहरीदेखि तरहरासम्मको विभिन्न ठाउँमा नाप्ने कार्य भएको छ । नापजाँच गर्दा इटहरीदेखि तरहरासम्म सडकको कालोपत्रे गर्ने भाग एकै नास पाइएको तर तरहरा–आँपगाछी क्षेत्रमा फुटपाथ क्लियर गरिएको इटहरी चौकमा नगरेको पाइएको उपमेयर गौतमले बताउनुभयो ।
इटहरी चौक क्षेत्र सबैभन्दा बढी मान्छे हिंड्ने ठाउँ भएकाले फुटपाथ पनि क्लियर गरेर जानुपर्ने आफ्नो मान्यता रहेको उहाँको भनाइ छ । आर्थिक वर्ष २०६८÷०६९ बाट सुरु भएको रानी–धरान ६ लेन सडकको जम्मा लम्बाइ ४९ किलोमिटर रहेको छ । भारतको जोगबनी र चीनको किमाथांका क्षेत्र जोड्ने यो सडकले त्रिदेशीय महत्व बोकेको छ । रानीदेखि धरानसम्म ६ लेन सडक बनाउन १० अर्ब बजेट छुट्याएकोमा अहिले ७ अर्बको मात्र ठेक्का लागेको छ ।
