जिल्ला ट्राफिक प्रहरी कार्यालय मोरङका नयाँ प्रमुख राकेशकुमार पोद्दारले विराटनगरको महेन्द्रचोकदेखि बरगाछीसम्मको सडक क्षेत्रलाई नो पार्किङ जोन बनाईने बताउनुभएको छ ।

आजैबाट कार्यभार सम्हाल्नुभएका मोरङ ट्राफिक प्रहरी प्रमुख पोद्दारले संचारकर्मीसमक्ष आफ्ना कार्ययोजना प्रस्तुत गर्दै यस्तो बताउनुभएको हो । उहाँले सो क्षेत्रमा जताजतै सवारीसाधन पार्किङ गर्ने र जुनसुकै ठाँउबाट यात्रु चढाउने र ओराल्ने परिपाटिका कारण सडक जाम हुने गरेको बताउदै समस्या समाधन गर्न सो क्षेत्रलाई नो पार्किङ जोन बनाउने कार्ययोजना रहेको सुनाउनुभयो । प्रहरी निरीक्षक पोद्दारले नगरक्षेत्रमा जताततै सडक निर्माणको काम चलिरहेका कारण ट्राफिक ब्यवस्थापन चुनौतीको रुपमा रहेको बताउदै ट्राफिक ब्यवस्थापनगर्न सचेतनाको कामलाई प्रभावकारीरुपमा संचालन गरिने बताउनुभयो । उहाँले प्रदेशको राजधानी समेत रहेको विराटनगरलाई जाम रहित बनाउन आफुले यथासम्भव प्रयास गर्ने समेत बताउनुभयो । ट्राफिक प्रमुख पोद्दारले आयल निगम,सातघुम्ती र गुद्रीक्षेत्रमा गरिने अव्यवस्थित पार्किङलाई समेत निषेध गरिने बताउनुभयो ।