मोरङ, ९ फागुन । मोरङको कानेपोखरी गाँउपालिकामा भएको सडक दुर्घटनामा दुई जनाको मृत्यु भएको छ ।
आज बिहान कन्टेनर ट्रक र टाटा सुमो एकआपसमा ठोक्किदाँ झापाको अर्जुनधारा नगरपालिका–४ का ४७ वर्षीय रामकुमार अछामी र झापाको गौरादह नगरपालिका–४ का ४५ वर्षीय प्रकाश मगरको मृत्यु भएको हो । इलाका प्रहरी कार्यालय पथरीका प्रहरी निरीक्षक कमल बजगाईले सुमोमा सवार अछामीको घटनास्थलमै र मगरको उपचारका लागि विराटनगरतर्फ ल्याउने क्रममा बीच बाटोमै मृत्यु भएको बताउनुभयो । पूर्वबाट पश्चिमतर्फ जाँदै गरेको ना ३ ख ६९१८ नम्बरको कन्टेनरमा सोही दिशाबाट आउँदै गरेको बा ११ च ७९४८ नम्बरको यात्रुवाहक टाटा सुमो विहान करिब ५ बजे ठोक्किएर दुर्घटना भएको प्रहरी निरीक्षक बजगाईले जानकारी दिनुभयो । दुर्घटनामा गौरादह – ४ की ५५ वर्षीय दुर्गा मगर, ३८ वर्षीय बबिता मगर, १४ वर्षीय प्रविका मगर, ३५ वर्षीय योगेश न्यौपाने र काभ्रेको भुमुटार नगरपालिका–८ का २७ वर्षीय रमेश तामाङ, सुमो चालक झापाको दमक–२ का ३७ वर्षीय कूलबहादुर रेग्मी घाइते भएकाछन् । घाइते मध्ये दुर्गा र प्रविकाको अवस्था गम्भीर रहेको प्रहरीले जनाएको छ। घाइते सबैको विराटनगरस्थित न्युरो अस्पतालमा उपचार भइरहेको प्रहरीले जनाएको छ । प्रहरीले कन्टेनर र सुमोका चालकलाई नियन्त्रणमा लिएको छ।
