इनरुवा, २ माघ । सुनसरीको इनरुवामा जारी मनमोहन स्मृति राष्ट्रिय एक दिवसीय क्रिकेट प्रतियोगितामा लिग चरणका खेलहरु सकिएसँगै सेमिफाइनल समीकरण पूरा भएको छ ।
समूह चरणको आजको अन्तिम खेलमा पराजित भएपनि रनरेटका आधारमा नतिजा आफ्नो पक्षमा पार्दै प्रदेश नम्वर ७ सेमिफाइनल पुग्ने प्रतियोगिताको चौथो टिम बनेको छ । इनरुवा खेल मैदानमा सम्पन्न लिग चरणको आजको अन्तिम खेलमा भारतीय टिम १ विकेटले बिजयी भएपनि रनरेटमा पछि पर्दै प्रतियोगिताबाट बाहिरिएको छ । जारी प्रतियोगितामा बिभागिय टिम नेपाल पुलिस र आर्मी सहित प्रदेश नम्वर १ ले यस अघिनै सेमिफाइनलमा स्थान सुरक्षित गरिसकेका छन् । आजको खेलमा प्रदेश नम्वर ७ ले दिएको १ सय ८५ रनको लक्ष्य भारतीय टिमले ३८ औं ओभरमा ९ विकेटको क्षतिमा पुरा गर्यो । यसअघि टस जितेर पहिलो ब्याटिङ गरेको प्रदेश नम्वर ७ ले विपिन रावलको अर्धशतकको मद्दतमा १ सय ८४ रन जोडेको थियो । सेमिफाइनलका खेलहरु भोलिबाट संचालन हुनेछन् । पहिलो सेमिफाइनलमा भोलि नेपाल पुलिस क्लब र प्रदेश नम्वर ७ बिच खेल हुनेछ ।
