विराटनगर, ५ पुष । विराटनगरमा आज अपरान्ह भएको सडक दुर्घटनामा परि एक महिलाको ज्यान गएको छ ।
दुर्घटनामा उनका श्रीमान घाइते भएका छन । सांझ पौने ६ बजे विराटनगरको वरगाछी चोकमा भएको दुर्घटनामा पथरी १० की २३ बर्षिया हेमा कार्कीको ज्यान गएको जिल्ला ट्राफिक प्रहरी कार्यालय मोरङका प्रमुख शिवप्रसाद पोखरेलले जानकारी दिनुभयो । सो घटनामा मृतकका श्रीमान मनोज कार्की घाइते भएका छन । उनको स्थानिय अस्पतालमा उपचार भइरहेको प्रहरीले जनाएको छ । को २८ प ३८५६ नम्बरको सुजुकी मोटरसाइकलमा सवार दुवैजना विराटनगरबाट उत्तरतर्फ जांदैगर्दा दुर्घटना भएको हो । बरगाछीबाट इटहरीतर्फ जांदै गरेको मोटरसाइकल सडककोबीचमा राखिएको डिभाइडरमा ठोक्किएर दुर्घटना भएको प्रत्यक्षदर्शीले बताएका छन । डिभाइडरमा मोटरसाइकल ठोक्किएर महिला सडकमा उछिट्टिए लगत्तै पछाडिबाट आउदै गरेको ना ७ ख ४६२३ नम्बरको डिजल ट्यांकरले किचेको ट्यांकर चालकको भनाई उद्धृतगर्दै ट्यांकरधनिका आफन्त मुकुन्द न्यौपानेले जानकारी दिनुभयो ।
दुर्घटना लगत्तै ट्यांकर र सो ट्यांकरका चालक विराटनगर १२ का ४५ बर्षिय लिला भुजेललाई प्रहरीले नियन्त्रणमा लिएको छ । घटनाको बिषयमा थप अनुसन्धान भइरहेको प्रहरीले जनाएको छ ।
