बलिउड अभिनेत्री प्रियंका चोपडाले बुधबार आफ्नो इन्स्टाग्राममार्फत् आफू बेहुली बन्दा लगाएको वेडिङ गाउन सार्वजनिक गरिन् । उनको यो पहिरनको अहिले सर्वत्र चर्चा छ ।
प्रियंका र अमेरिकी गायक निक जोनसले केही गएको साता भारतको राजस्थानस्थित जोधपुरमा भव्य रूपमा विवाह गरेका थिए । प्रियंकाले बुधबार उनले विवाहको क्रममा लगाएको गाउनको भिडियो र फोटो इन्स्टाग्राममार्फत सार्वजनिक गरिन् ।
उनको यो पहिरनमा बीस लाखवटा सितारा जडित थियो । यो पहिरन राल्फ लोरेनले डिजाइन गरेका थिए । उनको यो पहिरनले सबैको ध्यान खिच्यो । अहिले इन्टरनेटमा मानिसहरूले उनको पहिरनबारे चर्चा गर्न थालेका छन् ।
धेरै ठूलो भएकाले उनको त्यो पहिरन बोक्न अरु मानिसको पनि सहयोगको आवश्यकता परेको थियो ।
पिपल म्यागजिनसँग कुराकानी गर्दै प्रियंकाले आफ्नो विवाह धार्मिक मिश्रण भएको प्रतिक्रिया दिएकी छिन् । उनीहरुले पहिला हिन्दु र पछि इसाई संस्कृति अनुसार विवाह गरेका थिए । इसाई परम्परा अनुसार आयोजित विवाह जोनासका पिता पल केविनले सम्पन्न गराएका थिए ।
