कालोपत्रे सडक निर्माण कार्यमा ढिलासुस्ती भएको भन्दै धुलो पीडित स्थानीयले झापाको चाराआली–केचना सडक खण्ड अवरोध गरेका छन् । चाराआली– भद्रपुर–केचना सडक खण्ड अन्तरगत भद्रपुर नगरपालिका ६ स्थित भानुनगरमा स्थानीयले तीन घण्टा सडक अवरोध गरेका हुन् । विहान ६ बजेदेखि महिलासहित सडकमा उत्रिएका स्थानीयले भानुचोकमा बाँस तेर्साएर सडक अवरोध गरेका थिए । स्थानीयले सडक अवरोध गरेपछि सो सडक खण्डमा चल्ने सवारीसाधनहरु भद्रपुर नगरपालिका अन्तरगतको सडक प्रयोग गरेर गन्तव्यतर्फ जान बाध्य भएका थिए । दुई किलोमिटर सडक निर्माण कार्यमा ढिलासुस्ती हुदाँ त्यहाँका जनता धुलोबाट पीडित बनेका छन् । झापाका प्रमुख जिल्ला अधिकारी र प्रहरी कार्यालय झापाका प्रमुखलाई यस बिषयमा जानकारी गराइसकेका प्रहरी निरीक्षक जवेगुले आन्दोलित बनेका स्थानीयलाई छलफल तथा वार्ताबाट समस्याको समाधान निकाल्न आग्रह गरेका थिए । प्रहरीको आग्रह अनुसार सडक निर्माण कम्पनीले तत्काल सडकमा पानी हाल्ने भएपछि स्थानीयले सडक सुचारु गर्न सहमत भएका थिए । २०७३ साल असोज १७ गते ३० महिनामा काम सक्ने गरी सम्झौता गरेपनि दुई बर्षको अवधिमा सो सडक खण्डमा करिब ८ किलोमिटर मात्रै कालोपत्रे भएको छ ।