काठमाडौ, २९ कार्तिक । सन् २०२० को टोकियो ओलम्पिक खेलकुदको छनोट चरणको दोस्रो चरणमा पुगेको नेपाली महिला फुटबल टोली स्वदेश फर्किएको छ ।
नेपाली टोलीलाई आज त्रिभुवन अन्तर्राष्ट्रिय विमानस्थलमा अखिल नेपाल फुटबल संघ (एन्फा)का अध्यक्ष कर्माछिरिङ शेर्पासहितका पदाधिकारी एवं राष्ट्रिय खेलकुद परिषदका नवनियुक्त उपाध्यक्ष पिताम्बर तिम्सिनालगायतले स्वागत गर्नुभएको छ । म्यानमारमा भएको छनोटमा नेपालले समूह चरणमा अपराजित रहँदै दोस्रो चरणमा ठाउँ बनाएको हो । नेपालले भारत, म्यानमार र बंगलादेशसित समान १–१ गोलको बराबरी खेलेको थियो । पहिलो सहभागितामै नेपाल उत्कृष्ट तेस्रो टोलीकारुपमा दोस्रो चरणमा प्रवेश गर्न सफल भएको हो । छोटो समय चीनमा प्रशिक्षणका साथै तीन मैत्रीपूर्ण खेल खेल्दै म्यानमार प्रस्थान गरेको नेपाली टोलीले निकै राम्रो प्रदर्शन गरेको भन्दै प्रशिक्षक हरि खड्काले महिला फुटबलमा लगानी बढाउने हो भने अझ राम्रो प्रदर्शन गर्नसक्ने दाबी गर्नुभयो ।
