जर्मन घरेलु लिग बुण्डेस लिगामा साविक विजेता बायर्न म्युनिखको खराब लय जारी छ । जारी सिजनमा तेस्रो हार ब्यहोर्ने क्रममा बार्यन लिग लिडर बोरुशिया डर्टमण्डसँग ३–२ गोलले पराजित भएको छ ।
डर्टमण्डको घरेलु मैदान सिग्नल इडुना पार्कमा बायर्नले सुरुआती अग्रता लिएको थियो । २६औं मिनेटमा रोवर्ट लेवाण्डोस्कीले गोल गरेका थिए । तर, जारी लिगमा अहिलेसम्म पराजित नभएको डर्टमण्ड दोस्रो हाफको सुरुमै पेनाल्टी गोलमार्फत खेलमा फर्कियो । उसका लागि मार्काे रिउसले गोल गरेका थिए । तर, त्यसको तीन मिनेटपछि नै पाहुना टोलीका लागि रोवर्ट लेवाण्डोस्कीले गोल गर्दै पुनः अग्रता दिलाए । त्यसयता डर्टमण्डले दुई गोल गर्न सफल भयो । जितसँगै शीर्ष स्थानमा डर्टमण्डको ११ खेलबाट २७ अंक भएको छ भने समान खेलबाट २० अंकसहित बायर्न तेस्रो स्थानमा छ । यस्तै गएराति भएको अर्काे खेलमा लिगको दोस्रो स्थानमा रहेको बोरुशिया मोन्चेनग्लाडबागले वेर्डर ब्रेमेनलाई ३–१ गोलले हराएको छ ।
