१७ कात्तिक,विराटनगर,
प्रदेश न १ को भूमि व्यवस्था, कृषि तथा सहकारी मन्त्रालयले आफ्नो मातहतका निर्देशनालय र सेवा केन्द्र लगायत सम्पूर्ण कार्यालयहरुलाई बजेट तथा कार्यक्रमको अख्तियारी हस्तान्तरण गरेको छ । मन्त्रालयले आज विराटनगरमा अभिमुखिकरण कार्यक्रमको आयोजना गर्दै अख्तियारी हस्तान्तरण गरेको हो । आर्थिक वर्षको पहिलो चौमासिक सकिन लाग्दा मन्त्रालयले आफू मातहतका सम्पूर्ण निकायहरुलाई बजेट तथा कार्यक्रमहरु संचालन गर्ने अख्तियारी हस्तान्तरण गरेको हो । कार्यक्रममा बोल्दै प्रदेशका आर्थिक मामिला तथा योजना मन्त्री इन्द्रबहादुर आङ्वोले प्रदेश सरकारले निर्वाहमुखी कृषिलाई व्यवसायिक र आधुनिक बनाई आत्मनिर्भरता बढाउने कुरालाई प्राथमिकतामा राखेको बताउनुभयो । प्रदेश सरकारले आगामी पाँचवर्ष भित्र कृषिलाई आधुनिकिकरण गरी गोरु जोत्ने अवस्थाको अन्त्य गर्ने उहाँले प्रतिबद्धता व्यक्त गर्नुभयो । कार्यक्रममा बोल्दै एक नम्बर प्रदेशका प्रमुख सचिव केदार न्यौपानेले नयाँ संरचना भएकाले काम गर्न केहि कठिनाई भएपनि आफ्नो अधिकार र कार्य क्षेत्र बुझेर प्रभावकारी काम गर्न मन्त्रालयका सचिव र अन्य कार्यालयका प्रमुखहरुलाई निर्देशन दिनुभयो । कृषकसंग नजिक भएर काम गर्न आग्रह गर्दै उहाँले नयाँ संरचनामा काम गर्न केहि कठिनाई छ भन्दैमा काममा ढिलासुस्ती गर्नेलाई छुट नहुने बताउनुभयो । मन्त्रालयले विराटनगरमा कृषि विकास निर्देशनालय, पशुपंक्षी तथा मत्स्य विकास निर्देशनालय, विभिन्न जिल्लामा ११ वटा ज्ञान केन्द्र, ३ वटा कृषि ज्ञान केन्द्र सम्पर्क केन्द्र, कृषि व्यवसाय प्रवर्धन सहयोग तथा तालिम केन्द्र र विभिन्न स्थानमा ८ वटा फार्म केन्द्रहरु स्थापना गरिसकेको छ ।