विराटनगर, २८ जेठ । मोरङको उर्लाबारीमा बसमा आगो लगाउनेहरुलाई प्रहरीले पक्राउ गरि सार्वजनिक गरेको छ । गत बिहिबार उर्लाबारी ३ नयाँ मंगलबारेस्थित पूर्व पश्चिम राजमार्गमा स्कुटरलाई ठक्कर दिदाँ स्कुर चालकको मृत्यु भएपछि स्थानीयले बसमा आगजनी गरेका थिए । मे १ ख ३०७३ नम्बरको बसले प्रदेश ०१– ०१– ०१३ नम्बरको स्कुटरलाई ठक्कर दिएको थियो । दुर्घटनामा स्कुटर चालक झापाको कमल गाउँपालिका २ का ३३ वर्षीय पवन सुवेदी गम्भीर घाइते भएका थिए ।
उनको उपचारको लागि मदन भण्डारी ट्रमा अस्पताल उर्लाबारीमा उपचारको क्रममा मृत्यु भएको थियो । सोही घटनापछि बसमा आगो लगाउनेहरुलाई प्रहरीले पक्राउ गरि आज सार्वजनिक गरेको छ । प्रहरीले मोरङको पथरी १ का प्रज्वल भनिने गोकुल भण्डारी, वडा नम्बर ४ का जीवन थापा, ९ का अनमोल राई, वडा नम्बर २ का अयुस रिजाल र गोरे भन्ने मोहनकुमार मगरलाई पक्राउ गरेको हो । पक्राउ परेका माथि थप अनुसन्धान भइरहेको मोरङ प्रहरी प्रवक्ता प्रहरी नायव उपरीक्षक रञ्जनकुमार दाहालले बताउनुभयो ।
