मोरङ सुन्दरहरैंचा २९ असोज
मोरङको सुन्दरहरैंचामा देशमै पहिलोपटक अन्तर्राष्ट्रिय मापदण्डको सार्वजनिक शौचालय निर्माण गरिएको छ । नगरका ८ ठाउँमा पुस्तकालयसहितको सुविधा सम्पन्न सार्वजनिक शौचालय बनाउने अभियान अन्तरगत २ ठाउँमा निर्माण सम्पन्न भइ उद्घाटन समेत गरिएको छ । मुख्यमन्त्रीले नै सार्वजनिक शौचालय उद्घाटन गरेको भन्ने सुन्दा जो कोहीलाई अचम्म लाग्न सक्छ । तर प्रदेश १ का मुख्यमन्त्री शेरधन राईले प्रमुख अतिथि भएर मंगलबार मोरङको सुन्दरहरैंचामा सार्वजनिक शौचालयको उद्घाटन गर्नुभयो । तर मुख्यमन्त्री राईले उद्घाटन गरेको सो शौचालय देशकै नमुना शौचालयको रुपमा रहेको छ । कार्यक्रममा सम्बोधन गर्दै मुख्यमन्त्री राई स्वयम्ले सुन्दरहरैंचामा देशमै पहिलो पटक पुस्तकालयसहितको सुविधा सम्पन्न सार्वजनिक शौचालय बनेको भन्दै सुन्दरहरैंचाबासीलाई धन्यवाद दिनुभयो । सुन्दरहरैंचा उद्योग वाणिज्य संघको अगुवाईमा स्थानीय समाजसेवी, व्यवसायीसहितका नगरबासी तथा नगरपालिकाको सहकार्यमा नगरका ८ वटा ठाउँमा पुस्तकालयसहितको अन्तर्राष्ट्रिय मापदण्डको सार्वजनिक शौचालय बनाउने योजना अनुसार २ वटा शौचालय निर्माण सम्पन्न भएपछि मुख्यमन्त्री राईलाई बोलाएर उद्घाटन गरिएको हो । सलकपुर र विरोटचौकमा भवन निर्माण सम्पन्न भइ उद्घाटन समेत भएको अवस्थामा खोर्साने र हरैंचामा निर्माणको अन्तिम चरणमा रहेको तथा गोठगाउँ, गछिया, बलिया र मृगौलियामा चाँडै निर्माण कार्य अघि बढाइने बताइएको छ । दुई ठाउँमा सबै काम सम्पन्न भइसक्दा र अन्य २ ठाउँमा भवन निर्माणको काम अन्तिम चरणमा पुगिरहेको बेला ३ करोड बढी रकम खर्च भइसकेको निर्माण समितिले जनाएको छ । उद्घाटन कार्यक्रममा बोल्दै प्रदेश सांसद् राजकुमार ओझाले बाँकी भवन निर्माणको काममा प्रदेश सरकारबाट समेत बजेट विनियोजन गर्न मुख्यमन्त्री राई समक्ष आग्रह गर्नुभयो । सो भवन निर्माणमा ३५ प्रतिशत भन्दा बढी लगानी नगरपालिकाले गरेको छ । नगर प्रमुख शिवप्रसाद ढकालले पर्याप्त बजेट नभएको अवस्थामा समेत नगरपालिकाले नगरको गौरवको काम भएकाले सहयोग गरेको र आगामी दिनमा पनि बजेट छुट्याउने प्रतिवद्धता जनाउनुभयो । सुन्दरहरैंचा नगरपालिका क्षेत्र तत्कालिन गाविस हुँदाको अवस्था देखि नै हरेक क्षेत्रमा अग्रणी रहने गरेको छ । पूर्वकै शैक्षिक हबको रुपमा विकास भएको क्षेत्र तथा पहिलो बन्द निशेधित क्षेत्र र बसोबासका लागि उत्कृष्ट गन्तव्यको रुपमा पहिचान बनाएको सुन्दरहरैंचा, अब पुस्तकालयसहितको अन्तर्राष्ट्रिय मापदण्डको सार्वजनिक शौचालय भएको देशकै एकमात्र नगरको रुपमा समेत परिचित बन्ने भएको छ ।