विराटनगर २७ असोज
नेपालीहरुको महान पर्व दसैं, तिहार, छठलगायतका पर्वहरुमा प्रदेश–१ मा कोरोना भाइरसको प्रकोप उच्च हुने अनुमान गरिएको छ । पछिल्लो सयम हटस्पटका रुपमा देखिएको काठमाडौंसँगको सम्बन्धका कारण प्रदेशमा संक्रमण उच्च हुने आँकलन गरिएको हो । नजिकिँदो चाडपर्वका कारण संक्रमणको जोखिम बढ्ने भएपछि प्रदेश राजनीतिक नेतृत्वका लागि टाउको दुखाइको विषय भएको छ । नजिकिँदो दशैंतिहार र छठलगायतका विभिन्न चाडपर्वमा मानवीय गतिविधि, जमघट र भेला तीव्र हुने भएपछि संक्रमणको जोखिम बढेको हो । यसअघि भारतसँगको खुल्ला सिमानाका कारण प्रदेश एकको सिमावर्ती पालिकाहरुमा संक्रमणको जोखिम रहेकामा पछिल्लो समय काठमाडौंसँगको सम्बन्धका कारण जोखिम उच्च भएको हो । चाडपर्वमा रोजगारी तथा विभिन्न कामका सिलसिलामा काठमाडौं बस्दै आएका सर्वसाधारण आ–आफ्ना घर आउने भएकाले संक्रमणको जोखिम उच्च हुने अवस्था छ । जोखिम बढ्ने देखिएका कारण त्यसप्रकारको चुनौतीको सामना गर्न मन्त्रालयस्तरमा छलफल गर्ने तथा योजना बनाउने काम भइरहेको प्रदेश एकका सामाजिक विकासमन्त्री जीवन घिमिरेले बताउनुभयो । यसपटक कात्तिक १ देखि दशैं सुरु हुँदैछ । दशैसँगै सुरु हुने चाडपर्वको सिलसिला छैठपछि मात्र समाप्त हुन्छ । यो अवधिमा काठमाडौंबाट अत्यधिक मानिसहरु घर फर्किने भएका कारण यातायात साधनहरुमा समेत भीडभाड रहन्छ । अवस्था विगतको जस्तो नरहेकाले भीडभाडका कारण संक्रमणको जोखिम उच्च छ । त्यसरी घर फर्किने मानिसहरुले आफूसँगै भाइरसको संक्रमण घरसम्मै लैजानसक्ने अवस्था छ । त्यसैले यसपटक विगतको भन्दा फरक ढंगले चाडपर्व मनाउनुपर्ने अवस्था रहेको प्रदेश एकका मुख्यमन्त्री शेरधन राईले बताउनुभएको छ । संक्रमणको जोखिमका कारण सामान्य अवस्थामा हुँदै आएका क्रियाकलापहरुलाई रोक्नुपर्ने तथा जहाँ छौं त्यहींबाट चाडपर्व मान्नुपर्ने अवस्था रहेको उहाँको भनाइ छ । मुख्यमन्त्री स्वयंले सामान्य अवस्थाका गतिविधिहरु रोक्नुपर्ने अवस्था रहेको बताइसक्नु भएका कारण फेरि पनि लकडाउन हुनसक्ने सम्भावना देखिएको छ । मुख्यमन्त्रीको यस्तो अभिव्यक्ति आइरहँदा पनि अवस्था हेरेर मात्र सरकारले लकडाउन गर्ने कि नगर्नेे निष्कर्षमा पुग्ने निश्चित छ । सरकारको निर्णय जेजस्तो आए पनि संक्रमणबाट आफू पनि जोगिनु र अरुलाई पनि जोगाउनु सबैको दायित्व हो । तसर्थ यसपटकको चाडपर्व मनाउँदा निकै नै सावधानी अपनाउनुपर्ने देखिन्छ । विगतको जस्तो स्वच्छन्दता सबैका लागि घातक हुनसक्छ ।
