मोरङ २६ असोज
शारीरिक अपाङ्गता भएका व्यक्तिप्रति समाजको हेर्ने दृष्टिको फरक छ । अर्थात अपाङ्गता भएका व्यक्तिहरुलाई बोझको रुपमा हेर्नेहरु पनि भेटिन्छन् समाजमा । तर, मोरङको ग्रामथान गाउँपालिकाकी एक युवती शारीरिक रुपमा अपाङ्ग भएर पनि सपाङ्गले झैं जीवन व्यतीत गरिरहेकी छन् । मोरङ ग्रामथान गाउँपालिका वडा–७ धोबियारे गाउँकी सेवाबती भगत सानैदेखि गायन क्षेत्रमा रुचि राख्ने व्यक्ति हुन् । उनीसँग लाखौँ मानिसलाई मन्त्रमुग्ध पार्न सक्ने सुमधुर स्वर छ । सानैदेखि गायन क्षेत्रमा रुचि राख्ने सेवाबती भगत जन्मजात पोलियो रोग ग्रस्त छिन तर पनि उनले आफ्नो प्रतिभा भने मर्न दिएकि छैनन् । आमा बुवाको मृत्युपछि आफ्नो घरमै चटपटे बेचेर जीवन धान्दै आएकी छिन । जन्माजात पोलियो रोगबाट ग्रस्त भएकी उनलाई उपचार गर्न उनको बुवा अमाले लाखौं खर्च गरे तर सम्भव नै भएन । उनकी एक बहिनी र साथीहरुको सहारामा स्कुल जान भने छाडिनन् । उनले कक्षा १२ सम्मको अध्ययन गरिन् । तर बुबाको मृत्युपछि भने उनले विद्यालय गएर पढ्न पाईनन् । प्रतिभाकी धनी सेवावती विभिन्न कार्यक्रममा समेत भाग लिने गर्छिन् । उनले गीत गाएर विभिन्न पुरस्कारसमेत पाएकी छिन् । मोरङ र सुनसरीका विभिन्न स्थानमा गएर स्टेजमा प्रस्तुति दिएर आफ्नो प्रतिभा देखाएकी छिन् । सेवाबतीले यतिखेर गित गाउने अबसर नपाउँदा आफ्नो प्रतिभा आफैभित्र कुहिन्छ कि भन्ने डर छ । उनी अवसरको खोजिमा छिन । हाल घरमै चटपटे वेचेर गुजारी गरिरहेकी छिन् । घरको काममा दिदीको छोरीले सहयोग पुर्याउँदै आएकी छिन् । काम गरिदिने मान्छे नहुँदा कहिलेकही भोकै सुत्नु परेको पीडा पनि उनीसँग छ । अपाङ्गता भएका व्यक्तिहरुको सहयोगी संस्था सिबिआरले दिएको साइकलसमेत बिग्रिएर यताउत हिडडुल गर्नसमेत अप्ठ्यारो परिरहेको छ । तर, आर्थिक अबस्था अति कमजोर भएका आफूजस्ता अशक्त व्यक्तिको पुकार सुन्ने संस्था वा मानिसको पर्खाइमा छिन् । समाजले जतिसुकै लाल्छना लाए पनि, तिरस्कार गरे पनि त्यसलाई कुल्चिर अघि बढ्नुपर्ने शारीरिक अपाङ्गता भएका व्यक्तिको विवशता भएको स्थानीय युवा सुन्दाराम थन्दार बताउँछन् । विपन्न परिवारमा जन्मिएर पनि कलालाई मर्न नदिने ईच्छाशक्ति भएकी भगतको कलाले अवसर पाउने हो भने मात्र पनि त्यसले राम्रो आकार पाउने, अर्का स्थानीय युवा वीरेन्द्र चौधरीले भनाइ छ । उनलाई अवसर दिनुपर्ने र सहयोग गर्नुपर्ने चौधरी बताउँछन । सेवावती एक प्रतिभावन चेली हुन् । उनको प्रतिभालाई समाजले चिन्न सकेको छैन । अर्काे कुरा सेवावतीले प्रतिभालाई शारीरिक तथा आर्थिक कुनै कारणले पनि रोक्न सक्दैन भन्ने गतिलो उदाहरण दिन सकेकी छिन् । एक्लो र बेसाहरा जीवन बिताउने सेवावतीलाई सबैको माया र सहयोगको खाँचो छ ।