एजेन्सी २५ असोज

इण्डियन प्रिमियर लिग (आईपीएल) क्रिकेटमा रोयल च्यालेन्जर्स बेंग्लोरले चौथो जित निकालेको छ । हिजो राति भएको खेलमा साविक उपविजेता चेन्नई सुपर किङ्सलाई ३७ रनले हराउँदै बेंग्लोरले चौथो जित निकालेको हो । दुबई अन्तर्राष्ट्रिय क्रिकेट स्टेडियममा बेग्लोरले दिएको एकसय ७० रनको लक्ष्यसहित जवाफी ब्याटिङ गरेको चेन्नईले २० ओभरमा ८ विकेट गुमाएर १ सय ३२ रन मात्र बनाउन सक्यो । चेन्नईका लागि अम्बाती रायाडुले सर्वाधिक ४२ रन बनाए । यस्तै नारायण जागाडिसनले ३३ रन जोड्दा शेन वाट्सनले १४ र कप्तान महेन्द्र सिंह धोनीले १० रन बनाए । यसअघि टस जितेर पहिले ब्याटिङ गरेको बेंग्लोरले २० ओभरमा चारविकेट गुमाएर एकसय ६९ रन बनाएको थियो । बेंग्लोरका लागि कप्तान विराट कोहलीले अविजित रहँदै ९० रनको अर्धशतकीय इनिङ्स खेले । जितसँगै बेंग्लोर तालिकाको चौथो स्थानमा उक्लिएको छ । बेंग्लोरले ६ खेलमा ८ अंक जोडेको छ । छैठौं स्थानको चेन्नईको यो पाँचौं हार हो । ७ खेलमा चेन्नईले ४ अंक मात्र जोडेको छ । यसअघि हिजै भएको खेलमा कोलकत्ता नाइट राइडर्सले किंग्स इलाभेन पञ्जाबलाई दुई रनले पराजित गरेको छ । जितसँगै कोलकत्ता ८ अंकसहित तालिकाको तेस्रो स्थानमा पुगेको छ भने २ अंक रहेको पञ्जाब पुछारमा छ