बिराटनगर २४ असोज
नजिकिंदै गरेको चाडपर्वलाई लक्षित गरी युनाइटेड रियल लेदरले आफ्ना उत्पादन बजारमा ल्याएको छ ।
युनाइटेड रियल लेदरले तत्कालका लागि पुरुष र महिलाका लागि जुत्ता र चप्पलको उत्पादन बजारमा ल्याएको हो । युनाइटेड रियल लेदरले विराटनगरस्थित सेन्ट्रल मलमा पहिलो बिक्री कक्ष हिजोदेखि सञ्चालनमा ल्याएको छ । बिक्री कक्षको उद्घाटन युनाइटेड रियल लेदरका सञ्चालक परवेज अक्तरले गर्नुभयो । सम्पूर्ण स्वदेशी कच्चापदार्थले नेपालमा उत्पादन गरिएका जुत्ता चप्पलहरू टिकाउ, बलियो र गुणस्तरीय रहेको अक्तरले बताउनुभयो । उहाँले आफ्ना उत्पादनहरू पूर्ण रुपमा छालाको भएको र कुनै मिसावट नभएको दाबी गर्नुभयो । सन् १९८४ देखि कच्चा छाला प्रशोधन गरी विदेश निर्यात गर्दै आए पनि लकडाउनका कारण छाला निर्यात कटौती भएपछि आफ्नै देशमा तयारी बस्तु उत्पादन गर्न थालेको उहाँले बताउनुभयो । युनाइटेड रियल लेदरले सुनसरीको दुहवीमा छाला जुत्ता उद्योग स्थापना गरेको छ । १० करोड रुपैयाँ लागतमा स्थापना भएको उद्योगले वार्षिक १ लाख जोर जुत्ता उत्पादन गर्ने लक्ष्य राखेको छ । उद्योगले पर्स, व्याग, ज्याकेटलगायतका उत्पादनहरू पनि चाँडै बजारमा ल्याउने जनाएको छ ।