बिराटनगर २३ असोज
विराटनगरस्थित गुद्री बजारमा बाख्राको मासु बेच्ने ब्यापारीलाई महानगरपालिकाको माछामासु निर्देशिका अनुसार कारबाही गरिने भएको छ । विराटनगर महानगरपालिकाकी उपमेयर इन्दिरा कार्कीको नेतृत्वमा बुधबार गरिएको अनुगमनको क्रममा गुद्री बजारका ५ वटा पसलहरुमा शिलबन्दी गरिएको थियो । उक्त पसलका ब्यापारीहरुले बाख्रा काटेर विक्री वितरण गरिरहेको पाइएपछि अनुगमन टोलीले पसलमा शिलबन्दी गरेको थियो । ती पसलधनीहरुले बाख्राको जनेन्द्रिय काटेर खसीको आकार दिएर उपभोक्तालाई झुक्याइरहेको पाइएपछि कारबाही प्रक्रिया अघि बढाइएको हो । छड्के अनुगमनमा परेका ५ मध्ये ४ वटा पसलका व्यापारीहरु मासु लुकाएर पसल खुल्लै छाडेर भागेका थिए भने बाख्रा काट्ने सबै पसलहरु तत्कालै बन्द गरी व्यापारीहरु भागेका थिए । भागेका व्यापारीहरुको पहिचान भइसकेको र उनीहरुलाई पत्र काटेर स्पष्टीकरण सोधी कारबाही अघि बढाइने विराटनगर महानगरपालिकाका प्रवक्ता राजेन्द्र प्रधानले बताउनुभयो । महानगरपालिकाको माछामासु निर्देशिका अनुसार कारवाही गरिने उहाँले बताउनुभयो । ब्यापारीहरुले खसीको मासु भन्दै उपभोक्तालाई झुक्याएर बाख्राको मासु बेचिरहेको गुनासोपछि उपमेयर कार्कीको नेतृत्वमा त्यहाँ अनुगमन गरिएको थियो ।