विराटनगर, ३० जेठ । नेपाली कांग्रेसका महामन्त्री गगन थापाले पार्टी सभापति शेरबहादुर देउवाले नेतृत्व हस्तान्तरण गरेर नयाँ पुस्तालाई मार्गप्रशस्त गर्न आग्रह गर्नुभएको छ । आज विराटनगर विमानस्थलमा पत्रकारहरूसँग कुरा गर्दै महामन्त्री थापाले पार्टीको हितका लागि सभापति देउवाले नेतृत्व हस्तान्तरण गर्दै मार्ग प्रशस्त गर्न आग्रह गर्नुभएको हो । सभापतिले जतिसक्दो छिटो नेतृत्व हस्तान्तरण गर्नुभयो कांग्रेस पार्टी र सभापति आफैलाई पनि फाइदा हुने थापाको भनाइ छ ।
थापाले नेपाली कांग्रेसमा परिवर्तनको खोजी भइरहेका कारण सभापति शेरबहादुर देउवा पदमा बसिरहे त्यस्तो परिवर्तन संभवन नहुने बताउनुभयो । उहाँले पार्टीलाई जनता र कार्यकर्ताको चाहना अनुसार परिवर्तन गर्न नेतृत्व हस्तान्तरण आबश्यक रहेको स्पष्ट पार्नुभयो । पार्टीलाई परिवर्तन गर्न यतिवेला चुनौति रहेको र चुनौतिको सामना गर्न नसके त्यहि चुनौतिले पार्टीलाई थिच्ने थापाले बताउनुभयो ।
