काठमाडौं, ९ जेठ । नेपाल काभा वुमन्स् भलिबल च्यालेन्ज कपको सेमिफाइनलमा पुगेको छ । आज त्रिपुरेश्वरस्थित कभर्ड हलमा नेपालले बंगलादेशलाई ३–० को सोझो सेटमा हराउँदै नेपालले सेमिफाइनलको यात्रा तय गरेको हो । आजको खेलमा नेपालले बंगलादेशलाई २५–१०, २५–८ र २५–९ ले हरायो । नेपाल, भारत, बंगलादेश र कीर्गिस्तान रहेको समूहमा दुई खेल जितेर नेपाल सेमिफाइनल प्रवेश गरेको हो । यसअघि हिजो नेपालले कीर्गिस्तानलाई पराजित गरेको थियो । प्रतियोगितामा नेपालसँगै भारत पनि सेमिफाइनलमा प्रवेश गरेको छ । भारतले सोमबार बंगलादेशलाई र मंगलबार कीर्गिस्तानलाई हराएको थियो । अब नेपाल र भारतबीचको खेलले समूह विजेता चयन हुनेछ ।