खोटाङ २६ असोज

आफ्नै श्रीमतीको हत्या गरी फरार रहेका एक ब्यक्ति पक्राउ परेका छन ।  पक्राउ पर्नेमा खोटाङ दिक्तेल रुपाकोट मझुवागढी–२ तालखर्कका ४० वर्षीय छत्रबहादुर गिरी छन् । गत शुक्रबार बिहान ५ बजे गिरीले ४४ बर्षिया श्रीमती ज्ञानकुमारी गिरीको हत्या गरेका थिए । घरमा बसिरहेको अवस्थामा बिहानीपख उनीहरुबीच घरायसी विषयमा सामान्य वादविवाद हुँदा छत्रबहादुरले मसला पिस्ने लोहोरोले ज्ञानकुमारीको कन्चटमा प्रहार गर्दा उनि गम्भीर घाइते भएकी थिइन् । घाइते ज्ञानकुमारीलाई थप उपचारका लागि गाडीमा काठमाडौं लैजाँदै गर्दा सोही दिन दिउँसो सवा २ बजे उनको बाटोमै मृत्यु भएको १ नम्बर प्रदेश प्रहरी कार्यालय विराटनगरले जनाएको छ । श्रीमतीलाई लोहोरोले कन्चटमा प्रहार गरेर छत्रबहादुर भने फरार भएका थिए । फरार रहेका उनलाई खोटाङबाटै पक्राउ गरिएको प्रहरीले जनाएको छ । उनी उपर कर्तब्य ज्यानअन्तर्गत मुद्दामा कानुनी कारबाही अगाडि बढाइएको प्रहरीले जनाएको छ ।