बारा १९ भाद्र
दुई महिनाअघि बाराको अमलेखगञ्जमा हत्या गरिएका निजगढ नगरपालिका वडा नम्बर ८ का ३४ वर्षीय लालध्वज लामा ‘सानू’ को हत्यामा संलग्न भएको आरोपमा पक्राउ परेका एक महिलासहित चार जनालाई बारा प्रहरीले जिल्ला अदालत बारामा पेश गरेको छ । प्रहरीले लामाको हत्या अभियोगमा पक्राउ परेकालाई आज अदालतमा पेश गरेको हो । निजगढ वडा नं.८ का ३३ वर्षिय केशवराज शिवाकोटी, सोही ठाउँकी ३९ वर्षीया बन्दना लामा, निजगढ वडा नं. ९ का ४५ वर्षीय ‘संजय’ भनिने चक्रबहादुर तामाङ्ग र सर्लाही जिल्ला बाग्मती नगरपालिका वडा नं.३ का २४ वर्षीय जोखबहादुर स्याङ्गतानलाई अदालत पेश गरेको जिल्ला प्रहरी कार्यालय, बाराका प्रवक्ता गौतम मिश्रले जानकारी दिनभयो । प्रहरीले अनुसन्धान पुरा गरी मुद्दा दर्ता गरिएको र अदालतमा थुनछेक बहससमेत सुरु भएको प्रवक्ता मिश्रले बताउनुभयो । अमलेखगंजस्थित ससुराली घरबाट गत असार २१ गते बेपत्ता बनेका लालध्वजको असार २८ गते स्थानीय सामुदायिक वनमा शव फेला परेको थियो । लालध्वजको शव सडेर गलेको र हात, खुट्टा र गुप्ताङ्गसमेत शरिरबाट छुट्टिएको अवस्थामा शव फेला परेको थियो । लालध्वजका दाजु आसमान लामाले घटनामा संलग्नलाई कडा कारबाही गर्न माग गर्नुभयो । लामा केही समयदेखि अमलेखगंजमा किराना पसल समेत चलाएर बस्दै आएका थिए ।
