मोरङ १७ असोज
मोरङको सुन्दरहरैंचा नगरपालिका–३ आइतबारेमा बोक्सीको आरोपमा एक महिलामाथि कुटपिट भएको छ ।
सुन्दरहरैंचा ३ कि स्थानीय २९ वर्षीया धनहीरा राईले छिमेकी ३८ वर्षीया महिलामाथि कुटपिट गरेकी हुन् । पीडित पक्षले दिएको किटानी जाहेरीपछि प्रहरीले कुटपिटमा संलग्न राईलाई पक्राउ गरेको छ । प्रहरीका अनुसार आफ्नो शरीरमा धामी उत्रिएको भन्दै राई थाल बजाएर मंगलबार साँझबाट चिन्ता बसेकी थिइन् । चिन्ता हेर्न आएकी छिमेकी महिलालाई उनले बुधबार बिहान साढे चार बजेतिर बोक्सीको आरोप लगाउँदै कुटपिट गरेको ईलाका प्रहरी कार्यालय बेलबारीका प्रमुख ऋषिराज ढकालले जानकारी दिएका छन् । महिलामाथि त्रिशूल प्रहार भएकाले पेट, हात, काँध, पाखुरालगायत शरीरका विभिन्न भागमा चोट लागेको छ । कुटपिटबाट घाइते भएर उठ्न नसक्ने बनेकी पीडित बुधबार दिनभर ओछ्यान परेकी थिइन् । पीडित महिलाका श्रीमान भने अर्काे बिहे गरेर तीन वर्षदेखि झापाको सुरुङ्गामा बस्दै आएका छन् । घरमा देवरका ८ वर्षीय छोरासहित बस्दै आएकी पीडितलाई श्रीमान आएर उपचारका लागि अस्पताल लगेपछि मात्र घटना बाहिर आएको हो । कुटपिट गर्ने महिलाविरुद्ध बोक्सी आरोपको कसुरमा कारबाही अघि बढाउन अनुसन्धान थालिएको इलाका प्रहरी कार्यालय बेलबारीका प्रहरी निरीक्षक ऋषिराज ढकालले बताउनुभयो ।
