बेलबारी मोरङ १५ असोज
मोरङको बेलबारी–६ यलम्बर टोलकी सुजता खत्रीले एउटा गाईबाट सुरु गरेको पशुपालन व्यवसायले अहिले मनग्गे आम्दानी दिइरहेको छ । एउटा गाईबाट सुरु गरेको पशुपालन व्यवसायले उनलाई आम्दानी मात्र नभएर एउटा सफल कृषकको रुपमा परिचयसमेत दिलाएको छ । सुजता आफू मात्र यो पेसामा लागिनन् उनले १० वर्षसम्म विदेश बसेका आफ्ना श्रीमानलाई समेत घर फर्काएर यही व्यवसायमा लगाउन सफल भएकी छिन् । एउटा गाईबाट सुरु गरेकी सुजतासँग अहिले गोठमा १५ माउ गाई छन् । उनले गाईको दूधबाट उनले मनग्गे आम्दानी लिइरहेकी छिन् । त्यसो त उनको सक्षम कृषि फममा गाईका अतिरिक्त लोकल कुखुरा, टर्की र बोयर जातका बोकासमेत रहेका छन् । हाल उनको फममा ८ सय कुखुरा र त्यति नै संख्यामा टर्की रहेका छन् । दाजुले सञ्चालन गरेको फर्मबाट प्रभावित भएर पशुपालनमा लागेको सुजता बताउँछिन् । उनका दाजुको वनिगाममा जयपति कृषि फम रहेको छ । पशुपाल तथा कृषि कर्ममा आफूहरुलाई वडा कार्यालयको सहयोग रहेको सुजता बताउँछिन् । खत्री परिवारले आफूसँग भएको जमिनमा बहुवर्षे र सिजनल घाँसको खेतिसमेत गरिरहेका छन् । पशुपालन गरेरै आफूहरुले मासिक पचास हजार जति कमाइ गरेको उनीहरु बताउँछन् । तर लकडाउनले गर्दा भने धेरै असर गरेको उनी बताउँछिन । लामो समय विदेश रहेका सन्देश खत्रीलाई अहिले आफ्नै देशमा केही गर्न पाउँदा साह्रै खुसी लागेको छ । सुरुमा परम्परावादी शैलीमै गाई पालन गरे पनि पछिल्लो समय भने आफूले आधुनिक तथा व्यवस्थित रुपमा गाईपालन गरेको बताउँछन् । वैदेशिक रोजगारमा गएर कमाएको भन्दा आफ्नै परिवारसँग बसेर कमाएको रकमको बढी महत्व रहेको उनी बताउँछन् ।
उनको कृषि फममा दुईजनाले रोजगार पाइरहेका छन् । सन्देशकी आमा पुन्यकला खत्री पनि छोराले आफ्नै गाउँमा परिवारसँगै काम गरिरहेकामा खुसी छिन् । पछिल्लो समय देशमा केही हुन्न भनेर भएभरको जग्गा जमिन बन्दकी राखेर विदेशिने होडबाजी छ । यस्तो होडवाजी चलिरहेको बेलामा कृषिकर्म गरेर देशमै राम्रो कमाइ गरेर राम्रो उदाहरण दिने बेलबारीकी सुजताबाट समाजले सिक्न जरुरी छ ।
