महोत्तरी २६ असोज
महोत्तरीको भंगहा नगरपालिकामा वडासचिवबाट बलात्कृत भएकी महिलालाई मुद्दा फिर्ता लिन विभिन्न प्रलोभन आउन थालेको छ । वडा सचिवविरुद्ध जिल्ला प्रहरी कार्यालय महोत्तरमा जबरजस्ती करणी उद्योगमा मुद्दा दर्ता भएपछि पीडितका आफन्तसँगै गाउँका अगुवाहरुबाट प्रलोभन आउन थालेको पीडितले बताएकी छन् । भंगहा नगरपालिका ९ का वडा सचिव मिथिलेश यादवले बुधबार ती महिलालाई बलात्कारको प्रयास गरेका थिए । हरिनमरी बजारबाट साँझ ढकिया बेचेर फर्किँदै गर्दा बाटोमै रोकेर पोखरी नजिक लगि लछारपछार गर्दै जबरजस्ती करणीको प्रयास गरेको महिलाको आरोप छ । पैसा लिएर मिलापत्र गर्न धेरैतिरबाट दबाब आएको पीडित महिलाको गुनासो छ ।यादव छुटेर आए परिवारै सिध्याउने धम्की आउने गरेको पीडित महिलाको भनाइ छ । धम्कीका कारण मानसिक तनाव भएको पीडित महिलाले बताइन् । यता महोत्तरीका प्रहरी उपरिक्षक टिकाबहादुर केसीले पिडितलाई धम्काएर मुद्दा फिर्ता गराउने कार्य गलत रहेको बताउँदै दोषिलाई कुनै पनि हालतमा नछाडिने बताउनुभयो । त्यसैगरि जिल्ला न्याधिवक्ता कृष्णप्रसाद पुडासैनीले जबजस्ती करण मुद्दामा ७ वर्षदेखि जन्मकैदसम्मको कानुनी व्यवस्था रहेको जानकारी दिनुभयो । २०७७ असोज १५ गते जबरजस्ती करणी मुद्दा दर्ता गरी थप अनुसन्धान भइरहेको जिल्ला प्रहरी कार्यालय महोत्तरीका प्रहरी उपरीक्षक केसीले जानकारी दिनुभयो । उहाँले पिडितलाई प्रलोभनको समेत कुरा आफुलाई जानकारी आएको र यस विषयमा समेत अनुसनधानको थालिएको बताउनुभयो  ।