मोरङको बेलबारी २८ भाद्र
मोरङको बेलबारी नगरपालिकाले कोरोना महामारीको समयमा समेत न्याय सम्पादनको कार्यलाई निरन्तरता दिइरहेको छ ।
विवाद समाधान अर्थात मेलमिलापका क्रममा न्यायिक समिति संयोजक समेत रहनुभएकी उपमेयर ढाकाकुमारी पराजुलीले लकडाउनका समयमा पनि न्याय सम्पादन प्रक्रियालाई निरन्तरता दिइरहेको बताउनुभयो । न्यायिक समितिमा विशेष गरी घर झगडा, साँध सिमाना, श्रीमान श्रीमतीबीचको विवादलगायतका समस्या लिएर आउने गरेको उहाँले जानकारी दिनुभयो । लकडाउनको समयमा पनि सामाजिक दूरीलाई कायम राख्दै न्याय सम्पादन गरिरहेको उपमेयर पराजुलीको भनाइ छ । समितिकी उजुरी प्रशासक तारा भट्टराईका अनुसार मुद्दा धेरै आए पनि न्यायिक समितिले छिटो छरितो न्याय सम्पादन गरेका कारण थोरै विवाद प्रक्रियामा रहेका बाहेक अधिकांश विवादहरु किनारा लागिसकेका छन् । बेलबारी नगरपालिकाको न्यायिक समिति सुरुवातका दिनमा अर्थात समिति गठन हुनेबित्तिकै स्थानीय तहहरुमध्ये देशमै पहिलोपटक सम्बन्ध विच्छेदको सम्पूर्ण काम किनारा लगाएर स्थानीय सरकारबाट नै पहिलोपटक सम्बन्ध बिच्छेद गरेर चर्चामा रहेको थियो । हाल उक्त कानुन परिमार्जन भएको छ ।
