बिराटनगर ३० असोज
उपचार खर्च तिर्न नसकेका कारण ३ दिनसम्म विराट अस्पतालबाट शव बुझ्न नपाएका पीडित पक्षले मृतक २ बर्षिय बालकको शव बुझेर लगेका छन ।
सिराहको मानपुर घर भएका २ वर्षिय बालक सिद्धार्थ सदाका आफ्न्तले बुधबार राति शव बुझेर अन्तिम संस्कार गर्न घरतर्फ लिएर गएका हुन । उपचारको क्रममा बालक सिद्धार्थको सोमबार नै विराट अस्पतालमा मृत्यु भएपनि उपचारमा लागेको रकम तिर्न नसकेपछि परिवारजनले शव बुझ्न नपाएको समाचार बुधबार मकालु टेलिभिजनले प्रशारण गरेको थियो । समाचार प्रशारणपछि ऋषिदेव समुदायका विभिन्न तीनवटा संस्थाले अस्पतालमा तिर्नुपर्ने छुटसहितको ४० हजार रकममध्ये ३५ हजार तिरिदिएपछि मृतक परिवारले शव बुझेका हुन । सोमबार नै बालकको मृत्यु भएपनि शव बुझ्न नपाएका कारण मृतक परिवार थप पीडित भएका थिए । असोज १५ गते नै आन्द्राको समस्याको उपचार गर्न भनेर विराटनगर ल्याइएका बालकको उपचार खर्च तीन लाख बढी पुगेपछि विपन्न परिवारले तिर्न असक्षम भएका थिए । खर्च अभावमा विचल्लि भएका मृतकका परिवार एक औषधि पसलको सटरको भर्याङमा भोकभोकै बस्दै आएका थिए ।
