बिराटनग २६ असोज

नेपाल–भारतको सीमा नाकाबाट आउजाउ पूर्ण बन्द भए पनि विराटनगरको सीमावर्ती भारतीय बजार जोगबनी दैनिक सयौं नेपाली पुग्छन् । सम्भावित संक्रमणलाई मध्यनजर गरेर सीमानाका बन्द गरिएको भए पनि सीमावर्ती भारतीय बजार आउजाउ गर्ने गरेको पाइएको छ ।  कोभिड–१९का कारण नेपालसँगको अन्तर्राष्ट्रिय सिमाना पूर्ण बन्द गरेको भनिए पनि भारतसँग जोडिएको विराटनगरको स्लामपुर नाका क्षेत्रमा खुल्ला रुपमा आउजाउ भइरहेको छ । मुख्य नाका जोगबनी र आइसिपीमा मानिसको आउजाउ नभए पनि छेउछाउका नाकामा खुलेआम आउजाउ हुने गरेको हो । आइसिपी र रानीको बीचमा रहेको इस्लामपुर नाकाबाट दैनिक ३ हजारभन्दा बढी नेपाली जोगवनीमा सामान खरिद गर्न पुुग्ने गरेका छन् । ठूलो संख्यामा मानिसहरु नेपालबाट इस्लामपुर नाका हँुदै जोगवनी सामान किन्न जाने गरेको स्थानीयको भनाइ छ । इस्लामपुरमा नेपाल प्रहरी, सशस्त्र प्रहरी बसे पनि नेपालतर्फबाट मानिसहरु सहजै आउजाउ गरिरहेका छन् । तरकारीलगायतका सामान किन्न हटिया जानेलाई भने प्रहरीले रोक्ने गरेको स्थानीयको भनाइ छ ।
कोरोना संक्रमण तीब्र गतिमा फैलिइरहेको अवस्थामा विराटनगरको इस्लामपुरमा भने मेला लाग्ने गरेको छ । सो नाका हुँदै जोगवनी जानेमा महिला र बालबालिकाको संख्या बढी छ । मेला लाग्ने गरेको इस्लामपुरमा प्रहरीले रकम लिएर मानिसलाई आउजाउ गर्न दिने गरेको स्थानीयको आरोप छ । दिउँसो कडाइ गर्ने प्रहरीले रातको समयमा भने रकम लिएर सामान कटाउने गरेको स्थानीय सलिम मियाँको आरोप छ । यता मोरङ प्रहरीले सिमानाका कडाई गरेको दाबी गर्दै आएको छ । जिल्ला प्रहरी कार्यालय मोरङका प्रमुख  प्रहरी उपरिक्षक सन्तोष खड्काले प्रहरीले रकम लिएको भन्ने आरोपको खण्डन गर्नुभयो । प्रहरी उपरिक्षक खड्काले कुनै प्रहरीले रकम लिएको प्रमाण भेटे कारवाही गर्नेसमेत चेतावनी दिनुभयो । चोर बाटो प्रयोग गरेर भारत पुगेर फर्कीने जो कोहीलाई पनि १४ दिने क्वारेनटाइनमा राखेर मात्र घर पठाइने बताउनुभयो । महामारीको समयमा इस्लामपुर नाकाबाट मानिसहरु खुल्ला रुपमा आए पनि अन्य नाकाबाट पनि लुकिछिपी आउने गरेका छन् । विराटनगरकै दरैया नाकाबाट पनि सामान किन्न नेपाली जोगवनी जाने गरेका छन् । दरैया नाकाको दसगजामा भएको पोखरीमा कम्मरसम्म डुबेर नेपालीहरु सामान ओसारी रहेको देख्न सकिन्छ ।