भद्रपुर २५ असोज

बाढीले मेची नदीको धार परिवर्तन गर्दा सीमा क्षेत्रका बासिन्दा उच्च जोखिममा परेका छन् । अविरल वर्षासँगै मेची नदीमा आएको बाढीले नेपाली भूमि कटान गर्दै बस्ती छेउबाटै पानी बग्न थालेपछि त्यहाँका बासिन्दा उच्च जोखिममा परेका हुन ।  कचनकवल गाउँपालिका ५ पाठामारीस्थित मेची नदीमा आएको बाढीले नेपाली भूमि कटान गर्दै सीमा पिलर ११२ नजिक आइपुगेको छ । सो क्षेत्र पाठामारी र भारतको ठाकुरगञ्ज बजार जोडने मुख्य नाका हो । त्यहाँ झोलुङ्गे पुल पनि निर्माणाधीन अवस्थामा रहेको छ । अहिले मेची नदीको धार हेर्दा सीमा पिलर र झोलुङ्गे पुलको पिलरसम्म आइपुगेको छ । २०२७ सालतिर खोला भारतीय सीमा नजिकैबाट बग्थियो । अहिलेसम्म जमिन कटान गर्दै नदी नेपाली भुभाग सम्म आइपुगेको कचनकवल गाउँपालिका वडा नम्बर ५ का वडाध्यक्ष महेशलाल गणेशले बताउनुभयो  यसपालि पाठामारी बजारदेखि उत्तरको भागमा मेचीले नदीले प्रहार गरेको छ । पाठामारी बजार नदीबाट जोगाउन संघीय तथा प्रदेश सरकारले सो स्थानदेखि माथिसम्म ढुुंगाको तटबन्ध लगाएको छ । बाढीको पानी तटबन्धमा ठोक्किदा बीच भागबाट पूर्वतर्फ गएको र निर्माणाधीन झोलुङ्गे पुल भन्दा तल्लो भागमा तटबन्ध नभएकोले नदीले पूरानो ठाउँबाट झन्डै २०० मिटरभित्र सम्म कटान गरेको स्थानीय प्रदिप हलुवाईले बताउनुभयो ।
पहिला गाउँपालिकाको पाठामारीसहित अधिकांश स्थान डुबानमा पदथ्र्याे, संघीय, प्रदेश र स्थानीय सरकारको सहयोगमा गाउँपालिकाले विभिन्न ठाउँ ठाउँमा तटबन्ध लगाएकोले यसबर्ष काहीँ पनि डुबान भएन । तर पाठामारीको केही भाग मेची नदीले कटान गर्यो । अब नदी कटान रोक्नुका साथै तटबन्धन लगाउने बिषयमा बजेटकै आवश्यकता रहेको वडाध्यक्ष महेशलाल गणेशले बताउनुभयो । सो नाकाबाट दुवै देशका नागरिक वर्षाको बेला डुङ्गा र हिउँदो बेला बाँसे पुलबाट आवतजावत गर्दै आइरहेका छन् । तर यसपालि सीमा नाका सिल भएकोले डुङ्गा चलेको छैन भने बाँसे पुलको ठेक्का पनि खुलेको छैन । नदीमा निर्माणाधीन झोलुङ्गे पुल बन्ने समेत अनिश्चित देखिएको छ । करिब ४ वर्ष बित्न लाग्दा समेत ठेकेदार कम्पनी दुई वटा अधुरो पिलर खडा गरेर बेपत्ता भएका छन् । अब नदी कटानसँगै सीमाका बस्ती जोगाउन तीनै तहका सरकारले पहल गर्नु पर्ने स्थानीयको माग छ ।