बिराटनगर २९ असोज

नोबेल शिक्षण अस्पतालमा पाठेघरको शल्यक्रिया गराएकी सोलुखुम्बु नोचासल्यान ४ की ३५ वर्षीय तारादेवी भट्टराईको चिकित्सकको लापरबाहीका कारण मृत्यु भएको आफन्तले आरोप लगाएका छन् । उपचारका लागि एकहप्ता अगाडि नै बिराटनगर आए पनि पिसिआर परीक्षण गराएर आइतबार अस्पताल भर्ना भएकी भट्टराईको सोमबार डा. शान्ति सुवेदीको नेतृत्वमा शल्यक्रिया गरिएको थियो । शल्यक्रियापछि भट्टराईको अवस्था सामान्य रहेको थियो । आईसियुमा राखिएकी भट्टराईको डाक्टरले कारण नखुलाई दोस्रो पटक पनि शल्यक्रिया गरेको आफन्तको आरोप छ । दोस्रोपटक शल्यक्रिया गरेपछि गम्भीर अवस्थामा बिरामीलाई भेन्टिलेटरमा राखिएको थियो । ट्युमरको शल्यक्रिया गर्दा आन्द्रा काटिएर बिरामीको मृत्युु भएको आफन्तको दाबी छ । मृतकका आफन्त राजन धमलाले डाक्टरको लापरबाहीकै कारण बिरामीको मृत्यु भएको बताउनुभयो । उहाँका अनुसार अस्पतालले एक चरणको वार्तामा आफ्नो गल्ती स्वीकारिसकेको छ । अस्पतालले मृतकको उपचारमा लागेको खर्च मिनाहा गरिदिनुका साथै मृतकको काजकिरियाका लागि १ लाख रुपैयाँ दिने सहमति गरेको उहाँको दाबी छ । मृतकका श्रीमान ओम भट्टराईले लापरबाही गर्ने डाक्टरलाई कारबाहीसहित राहत र ३ जना सन्तानको शिक्षाको जिम्मा अस्पतालले लिनुपर्ने माग गर्नुभयो । उहाँले माग पूरा नभएसम्म शव नबुभ्mने अडान राख्नुभयो । माग पूरा नगरे अस्पताल परिसरमै आत्मदाह गर्ने उहाँको चेतावनी थियो । यस विषयमा अस्पताल प्रशासनको प्रतिक्रिया लिन खोज्दा सम्पर्क हुन सकेन ।