ललितपुर १९ असोज
पार्टीका केही नेताहरुमा कोरोना संक्रमण देखिएपछि आजका लागि बोलाइएको कांग्रेस केन्द्रीय समितिको बैठक २५ गतेका लागि सारिएको छ । बैठककै लागि भनेर गरिएको कोरोना परीक्षणमा केन्द्रीय नेताहरुसहित १७ जनामा कोरोना देखिएको थियो । केन्द्रीय सदस्यहरु अर्जुननरसिंह केसी, गगन थापा, जंगीलाल यादव, अजयकुमार चौरसिया र रमेश रिजाल तथा आमन्त्रित केन्द्रीय सदस्यहरु कल्पना चौधरी र शम्भुलाल श्रेष्ठमा कोरोना संक्रमण देखिएको थियो । यसका साथै अन्य १० जना सुरक्षाकर्मी र चालकमा पनि संक्रमण देखिएको थियो । असोज १५ गते कांग्रेसले केन्द्रीय नेता तथा उनीहरुका सचिवालयका सदस्य र सुरक्षाकर्मी–कर्मचारी गरी दुईसय ४१ जनाको कोरोना परीक्षण गराएको थियो । कोरोना संक्रमण देखिएकै कारण शनिबार बसेको पदाधिकारी तथा पूर्वपदाधिकारीको बैठक पनि हिजो बसेन । शनिबार नसकिएकाले बैठक हिजो पनि जारी रहने भनिएको थियो ।