बिराटनगर २३ असोज
चोरी मुद्दाका फरार प्रतिवादीलाई प्रहरीले विराटनगरबाट पक्राउ गरेको छ ।
चोरी मुद्दाका फरार प्रतिवादी विराटनगर–१४ भगवती चोक बस्ने २६ वर्षीय नौलखी भनिने श्रीप्रसाद महतोलाई जिल्ला प्रहरी कार्यालय मोरङको प्रहरी टोलीले हिजो बिहान आफ्नै घरबाट पक्राउ गरेको छ । उक्त घटनामा संलग्न अर्का आरोपी विराटनगर–१४ कै सतिश झालाई असोज ११ गते प्रहरीले पक्राउ गरेको थियो । को ६ प ३४०० नम्बरको मोटरसाइकलमा सवार भएर गएका अभियुक्तद्वयले भदौ १८ गते रातको साढे ९ बजे ट्राफिकचोकबाट विराटनगर १० का मनोजकुमार गुप्ताको साथबाट जबर्जस्ती मोबाईल लुटेर फरार भएको जिल्ला प्रहरी कार्यालय मोरङका प्रवक्ता डिएसपी मानबहादुर राईले जानकारी दिनुभयो । दुवै अभियुक्त बिरुद्ध चोरीको मुद्दा चलाइएको उहाँले बताउनुभयो ।