बिराटनगर २३ असोज
लकडाउनले धेरै व्यक्तिको रोजीरोटी खोसिदिएको छ । रोजगारी गुमाएर कतिपय मानिसहरू भौतारिरहेको अवस्था छ भने कतिपय रोजगारीको खोजीमा छन् । तर, हरेक चुनौतीले सम्भावना बोकेको हुन्छ । चुनौतीलाई सम्भावनामा बदल्न सकियो भने त्यसले जीवनमा सकारात्मक प्रभाव पार्छ भन्ने प्रशस्तै उदाहरण भेटाउन सकिन्छ । कोभिडका कारण कामविहीन भएका कतिपय व्यक्तिहरूले यतिबेला घरमै सानोतिनो पेशा व्यवसाय गरेर आम्दानी गर्न सुरु गरिसकेका छन् ।  मोरङ झोराहाटका भरत गुरागाईंको परिचय भनेको साहित्यकार र कलाकार नै हो । विगत तीन दशकभन्दा लामो समयदेखि साहित्य लेखनमा सक्रिय हुनुहुन्छ गुरागाईं । खाँदाखाँदैको सरकारी शिक्षकको जागिर छाडेर नाट्य क्षेत्रमा लाग्नुभएका गुरागाईं पछिल्लो समय भने घरमै उत्पादन कर्ममा लाग्नुभएको छ । अन्य क्षेत्रलाई झैं नाट्य क्षेत्रलाई पनि कोरोनाले असर पारेपछि झोराहाटस्थित नाटकघरमा ताला लगाएर यतिबेला आफ्नै घरमा बट्टाई पालन सुरु गर्नुभएको छ उहाँले । कोरोनाले निम्त्याएको आर्थिक समस्यालाई समाधान गर्ने उद्देश्यले बट्टाई पाल्न सुरु गरेको उहाँ बताउनुहुन्छ । एक सयबाट सुरु गर्नुभएका गुरागाईंको खोरमा अहिले ५ सय बट्टाई छन् । ती बट्टाईले धमाधम अण्डा पार्न सुरु गरेका छन् । प्रतिगोटी अण्डा ७ रुपैयाँले बिक्री हुने गरेको उहाँले सुनाउनुभयो । उहाँका अनुसार भाले बट्टाई प्रतिगोटा २ सय र पोथी बट्टाई २ सय ५० रुपैयाँले बिक्री हुने गरेको छ । अण्डाको खपत राम्रो भइरहेको उहाँले बताउनुभयो । अब घरमै चल्ला उत्पादन गर्ने योजनाका साथ ह्याचिङ मेसिन र जेनेरेटरसमेत खरिद गरिसक्नु भएको छ गुरागाईंले । ह्याचिङ मेसिनमा अण्डा हालेको १५ देखि १७ दिनमा चल्ला उत्पादन हुने उहाँको भनाइ छ । प्रतिगोटा चल्लाको मूल्य ४० रुपैयाँ पर्छ । तर, चल्लाको माग बढी भएका कारण आफूले थप बट्टाई खोरमा लगाउन नपाएको उहाँले सुनाउनुभयो । चल्ला अभाव भएकै कारण आफैंले चल्ला उत्पादन गर्ने तयारी गरेको उहाँको भनाइ छ । चल्ला उत्पादन गरेर चाँडै नै ५ हजार बट्टाई पाल्ने तयारी गरेको गुरागाईंले बताउनुभयो । त्यसका लागि उहाँले खोरसमेत तयार गरिसक्नुभएको छ । उत्पादन गर्न सके अण्डाको माग बजारमा अत्यधिक रहेको उहाँको भनाइ छ । बट्टाईको अण्डा खाँदा थाइराइड, दम, मुटुलगायतका समस्या कम हुने जनाइएको छ । गुरागाईंको यो काममा आइटी अध्ययन गरेका छोराले साथ दिइरहेका छन् । छोराले युट्युुवमा हेरेर खोरको डिजाइन गर्नेदेखि बट्टाई पाल्ने तरिकाबारे जानकारी लिने गरेको गुरागाईंले बताउनुभयो । फुर्सदको समयमा त्यतिकै बस्नुभन्दा केही काम गर्दा नकारात्मक सोच नआउने र व्यस्त हुँदा शरीर पनि स्वस्थ हुने भएकाले बट्टाई पाल्न सुरु गरेको उहाँको भनाइ छ । त्यसो त गुरागाईंले बट्टाई मात्रै होइन स्थानीय जातका कुखुरा र खसी पनि पाल्नुभएको छ । कुखुराको अण्डाको पनि माग अत्याधिक रहेको उहाँले सुनाउनुभयो । उत्पादन गर्न सके बजारको समस्या नरहेको उहाँको अनुभव छ । कुखुरा र खसी पालनलाई पनि अझै व्यापक बनाउने योजना रहेको गुरागाईंले जानकारी दिनुभयो । कोरोनाका कारण यतिबेला मुलुककै अर्थतन्त्र थला परेको छ । यस्तो बेला हरेक नागरिकले आफ्नै घरमा सानोतिनो नै पेशा व्यवसायमार्फत उत्पादन कर्ममा ध्यान केन्द्रित गरेमा त्यसले राज्यलाई नै फाइदा पुग्ने देखिन्छ ।