बिराटनगर १५ असोज

इन्डियन प्रिमयर लिग (आईपीएल) को अनलाइन बेटिङ (सट्टाबाजी) मा संलग्न तीन जनालाई मोरङ प्रहरीले पक्राउ गरेको छ । मोरङ प्रहरी प्रमुख उपरीक्षक (एसपी) सन्तोष खड्काका अनुसार पक्राउ पर्नेहरुमा विराटनगर–१५ का ३८ वर्षीय सत्यजीत भन्ने मुन्ना साह, वैजनाथ साह र विराटनगर–१७ का ४२ वर्षीय जगदिश साह छन् । उनीहरुबाट नगद एवं सम्बन्धित कागजातसमेत बरामद भएको एसपी खड्काले बताउनुभयो । मोरङका प्रहरी प्रवक्ता डीएसपी मानबहादुर राईले आईपीएल सुरु भएदेखि यस्ता गतिविधिमा निगरानी राखिरहेको बताउनुभयो । सुराकी परिचालन गरेर सूचना संकलन गरी पक्राउ गरिएको उहाँले बताउनुभयो । दुबईमा जारी आईपीएलको १३ औं संस्करणमा ८ टिम सहभागी छन् ।