अबैध रूपमा नेपाल प्रवेश गर्न लागेका एक तिब्बती र ४ भुटानी नागरिकलाई सशस्त्र प्रहरीले नियन्त्रणमा लिएको छ ।

भारतको बोधगयाबाट काठमाण्डौं जान लागेको बा.५.ख.२३८८ नम्बरको नेपाल–भारत मैत्री बसमा सवार १ तिब्बती र ४ भुटानीलाई सशस्त्र प्रहरीले वीरगञ्जबाट नियन्त्रणमा लिएको हो । पक्राउ पर्नेमा तिब्बती नागरिक ४० वर्षीय कुन्छोक तसोमो, भुटानी नागरिकहरू ६५ वर्षीया डोल्मा तामाङ, ४३ वर्षीय छोदेन तामाङ, १९ वर्षीया छुन्दु लह्मो र ७० वर्षीय ज्ञानबहादुर तामाङ रहेका छन् । उनीहरूलाई आवश्यक अनुसन्धान र कारबाहीका लागि अध्यागमन विभाग काठमाडौं पठाइएको अध्यागमन कार्यालय, वीरगंजका अध्यागमन साहायक ध्रुव अधिकारीले बताएका छन् । यस अघि गत असोजमा पनि नेपाल–भारत मैत्री बसबाट ३ हजार थान अवैध लागूऔषध बरामद भएको थियो ।