१३ औं दक्षिण एसियाली खेलकुद सागको पदक तालिकामा नेपालको दोस्रो स्थान कायमै रहेको छ ।
नेपालले स्वर्णपदकको संख्या ४३ र्पुयाएको छ । आज एथलेक्टिसमा किरण सिंह बोगटी र कुस्तीमा संगीता धामीले स्वर्णपदक जितेसँगै स्वर्णको संख्या ४३ पुगेको हो । भारत ८९ स्वर्णसहित शीर्ष स्थानमा छ । तेस्रो स्थानको श्रीलंकाको २९, चौथो स्थानको पाकिस्तानको २०, पाँचौं स्थानको बंगलादेशको ४, छैटौं स्थानको माल्दिभ्सको १ स्वर्ण रहेको छ भने पुछारको भुटानका ५ वटा कास्यपदक रहेका छन् । आज कुस्तीमा नेपालकी संगीता धामीले स्वर्ण जितेकी हुन । ५५ किलो तौल समूहमा प्रतिस्पर्धा गरेकी उनले बंगलादेशकी सकिरा सरकाररिनेलाई ४—१ ले हराउँदै स्वर्ण जितेकी हुन् । सागको कुस्तीमा नेपालले जितेको यो नै पहिलो स्वर्ण हो । यसअघि हिजो नेपालले एक रजत र तीन कास्यपदक जितेको थियो । यस्तै एथ्लेटिक्सको म्याराथनमा नेपालले स्वर्णपदक जितेको छ । आजै भएको खेलमा नेपालले २४ वर्षपछि म्याराथनतर्फ स्वर्णपदक हात पारेको हो । दशरथ रंगशालामा भएको म्याराथनमा नेपालका किरण बोगटीले स्वर्णपदक जितेका हुन् । किरणले २ घण्टा २१ मिनेट १७ सेकेण्डको समयमा निर्धारित दूरी पूरा गरे ।
