स्वरसम्राट नारायण गोपालको २९ औं स्मृति दिवस आज काठमाडौंमा विभिन्न कार्यक्रम गरी मनाइदै छ ।
असंख्य कालजयी गीतका सर्जक तथा जादुमय स्वरका धनी स्वरसम्राट नारायणगोपालको जन्म बुबा आशगोपाल गुरुवाचार्य र आमा रामदेवी गुरुवाचार्यको कोखबाट १९९६ असोज १८ गते काठमाडौंमा भएको थियो । उहाँको विसं २०४७ मंसिर १९ गते ५१ वर्षको उमेरमा निधन भयो । नेपाली सांगीतिक क्षेत्रमा गहिरो प्रभाव छाडेर संसारबाट विदा हुनुभएका स्वरसम्राट अहिले पनि जनजनको मनमनमा जीवन्त हुनुहुन्छ । उहाँका कालजयी गीतहले नेपाली गीत संगीतको स्वरुप नै बदलिदिएको छ । प्रेम र देशभक्ति गीत गाउन मनपराउने स्वरसम्राट शब्द र संगीतमा निकै ध्यान दिनुहुन्थ्यो । त्यसैले त करिब १ सय गीतमा आवाज भर्नुभएका उहाँका सबै गीत कालजयी छन् । ‘यो सम्झिने मन छ, म बिर्सूं कसरी’, ‘आँखा छोपी नरोउ भनी भन्नु पर्या छ’, ‘एउटा मान्छेको मायाले कति’ जस्ता कालजयी गीतहरुमा आवाज दिनुभएका स्वरम्राटको स्वर माधुर्यले अहिलेपनि लोकप्रियताको सगरमाथा चुमिरहको छ ।
